Türkiyə yığmasının sabiq futbolçusu Fatih Təkkə Rusiyanın “Zenit” klubunun əsas komandasından kənarlaşdırılıb. Apasport.az saytının məlumatına görə, 32 yaşlı hücumçu əvəzedici heyətə göndərilib.

Buna Təkkənin işinə qeyri-peşəkar münasibəti səbəb olub. “Zenit”in baş məşqçisi Dik Advokat məşq prosesinə barmaqarası yanaşan türkiyəlini bu cür cəzalandırmaq qərarına gəlib: “Həmişə Təkkənin ən yaxşı hücumçulardan olduğunu düşünmüşəm. Elə indi də fikrimi dəyişmirəm. Lakin onun işinə münasibəti heç bir tənqid çərçivəsinə sığmır. Və bundan sonra o gedib gənclərdən ibarət komanda ilə məşq edəcək”.

Qeyd edək ki, Azərbaycan Premyer Liqasının arxada qalan mövsümündə də bir çox tanınan futbolçular, o cümlədən Rəşad Sadıqov, Georgi Adamiya və Aleksandr Çertoqanov əvəzedici komandaya göndərilib.