Konfederasiyalar Kubokunda İtaliya yığmasına qalib gələn Misir milli komandası üçün bu uğur tarixi əhəmiyyət kəsb edib. Apasport.az saytının hesablamalarına görə, afrikalılar tarixlərində ilk dəfə dördqat dünya çempionlarını üstələyiblər.

İndiyədək 4 dəfə apeninlərlə qarşılaşmış Misir yığması bütün matçlarda məğlub olmuşdu. 1920-ci il olimpiadasında rəqibinə 1:2 hesabı ilə uduzan Afrika təmsilçisi 8 il sonra keçirilən eyni yarışda darmadağınlar üzləşmişdi - 3:11.

1954-cü ildə keçirilən dünya çempionatının seçmə mərhələsindəki görüşlər də avropalıların qələbəsi ilə nəticələnib. 1953-cü ildə 2:1, bir il sonra isə 5:1 hesabı ilə qalib gələn “Skuadra Adzurra” 55 il idi ki, Misirlə üz-üzə gəlmirdi. Yarım əsrdən də artıq qarşılaşmayan rəqiblərin CAR-da baş tutan oyununda isə Afrika çempionu 1:0 hesabı ilə qalib gələrək, gec də olsa, qisas alıb.