“İnter”ə “Metallurq” nümunəsi

24.06.2009 - 09:48

Avropa Liqasının birinci təsnifat mərhələsində Bakının “İnter” klubunun rəqibi olan Slovakiyanın “Spartak” komandası növbəti yoxlama oyununu keçirib. Apasport.az saytının məlumatına görə, qitə miqyaslı turnirə hazırlıq məqsədilə Avstriyada təlim-məşq toplanışı keçirən Trnava təmsilçisi Ukraynanın “Metallurq” klubu ilə görüşüb.

Son Ukrayna çempionatında 4-cü yeri tutan donetsklilərlə qarşılaşmada qələbəni ukraynalılar bayram edib – 3:2. Slovakiyalıların qollarına matçda hesabı açan Hruşka və son saniyələrdə fərqi minimuma endirən Dolejal imza atıb.

“İnter”in rəqibi yoxlama oyununda 18 futbolçunun xidmətindən yararlanıb: Kralj - Kotula (Yakubiçka, 55), Dolejal, Gueye, L.Hanzel – Duriş (Guldan, 85), Kopunek (Kopça, 70), Proxazka (Jelezník, 20), Hruşka (Tomçak, 72) – Kozux (Danilo De Oliveyra, 67), Kone (Sukennik, 67).

Qeyd edək ki, “Spartak” Avstriya toplanışına qədər Slovakiyada yerli “Trençin” (2:0) və “Luçeneç” (1:1) klubları ilə yoxlama oyunları keçirmişdi.