Yığmamız Almaniyadan darmadağınla qayıdır

10.09.2009 - 00:36

Bu gün Azərbaycan yığması 2010-cu il dünya çempionatının seçmə mərhələsi çərçivəsində növbəti rəsmi görüşünü keçirəcək. Alman mütəxəssis Berti Foqtsun baş məşqçisi olduğu komandamız Bakı vaxtı ilə saat 23:45-də Almaniya ilə çətin oyuna çıxacaq.

Apasport.az-ın Hannover şəhərinə ezam olunan əməkdaşı “AWD Arena” stadionunda baş tutacaq qarşılaşmanı onlayn rejimdə yayımlayacaq. Sadiq oxucularımız oyunda baş verən ən maraqlı hadisələr, oyun sonrası keçiriləcək mətbuat konfransında baş məşqçilərin, eləcə də futbolçuların fikirləri haqda saytımızdan məlumat ala biləcəklər.

23:45. Almaniya – Azərbaycan - 4:0
QOLLAR: Ballak, 14 (pen.); Kloze, 54; 66; Podolski, 71

Almaniya: Rene Adler, Filip Lam, Per Mertezaker, Marsel Şafer (Andreas Bek, 46), Mixael Ballak (kapitan), Tomas Hitslşperger, Bastian Şvaynştayger (Pyotr Troxovski, 67), Məsut Özil, Lukaş Podolski, Heyko Vestermann, Mario Qomeş (Miroslav Kloze, 46).

Azərbaycan: Kamran Ağayev, Mahir Şükürov, Saşa Yunisoğlu, Vladimir Levin, Elnur Allahverdiyev, Samir Abbasov (kapitan), Aleksandr Çertoqanov, Rəşad Sadiqov, Vüqar Nadirov (Ernani Pereyra, 58), Elvin Məmmədov (Cavid Hüseynov, 67), Vaqif Cavadov.
Sarı vərəqə: Samir Abbasov, 13; Pereyra, 81.
Qırmızı vərəqə: Samir Abbasov, 54
Baş hakim: Anastasios Kakos
Baş hakimin köməkçiləri: Dimitrios Saraydaris, Spridon Trifonas
Dördüncü hakim: Dimitrios Kalopoulos
(Hakimlər briqadası Yunanıstandandır)
Hakim-inspektor: Dani Koren (İsrail)
UEFA nümayəndəsi: Mixail Kassabov (Bolqarıstan)

***Oyunun başlanmasına 20 dəqiqə qalmış tribunalara təxminən 20 min azarkeş toplaşıb.

***Hər iki ölkənin himnini canlı orkestr səsləndirəcək.

***Start heyətlərlə bağlı maraqlı məqamlar var. Almaniya yığmasının baş məqşçisi Yoahim Löv hücumçu Miroslav Klozeni ehtiyatda saxlayıb. Kloze ötən Bakıda keçirilən matçda komandasının ikinci qolunu vurmuşdu (0:2). Milli komandamızın çalışdırıcısı Berti Foqts isə zədədən əziyyət çəkən Rail Məlikovun adını ilk “18-liy”ə də salmayıb.

***“AWD Arena” stadionunda yığmamızı 300-dək azarkeş dəstəkləyəcək. Onların arasında Berlindən, Hamburqdan, Bakıdan və təbii ki, Hannoverdən gəlmiş azakeşlər var.

***Televiziya tamaşaçıları yuxarıdan çəkilişləri də görə biləcəklər. Belə ki, meydançanın üstündə 4 tərəfdən iplə quraşdırılmış kamera var.

***Azərbaycanlı azarkeşlər stadiona eni 4, uzunluğu isə 20 metr olan möhtəşəm bayrağımızı gətiriblər.

Oyun başlandı.

Matçı təxminən 35 min azarkeş izləyir.

6-cı dəq. Almanların ilk təhlükəli hücumu. Qomeşin yazın küncə zərbəsinin qola çevrilməsinə Kamran imkan vermədi.

7-ci dəq. Podolskinin cərimə meydançası daxilində qapıya endirdiyi zərbə zamanı Kamran yenə düzgün mövqe seçmişdi.

10-cu dəq. Şvaynştayger 2 futbolçumuzu keçir və əlverişli mövqedən zərbə vurur. Qapıçımız barmaqlarının ucu ilə topu xətdən çölə çıxarır.

13-cü dəq. Qapımıza penalti təyin olunur. Samir Abbasov Podolskinin qarşısını kobudluqla aldı.

14-cü dəq. Mixael Ballak 11 metrlik cərimə zərbəsini dəqiq yerinə yetirir - 1:0

17-ci dəq. Kamran yığmamızı real qoldan xilas etdi. Qomeşin baş zərbəsini ustalıqla dəf etdi.

19-cu dəq. Hesabı bərabərləşdirə bilərdik. Sadəcə, Vüqar Nadirovun sol cinahdan ötürməsinə Vaqif Cavadov bir an yubandı.

Bu dəqiqələrdə mübarizə əsasən meydanın mərkəzində gedir. Hər iki komandanın cərimə meydançasına girmək istəyi alınmır.

Almanların ötürmələrdə buraxdıqları uşaq səhvləri tamaşaçıların uğultulu təəccübünə səbəb olur.

37-ci dəq. Çertoqanovun təxminən 40 metrlik məsafədən vurduğu zərbəni Adler çətinliklə qapı xəttindən çıxardı. Ardından künc zərbəsindən ötürülən topu Vaqif buraxdı, Elvinin qüvvətli zərbəsini isə qapıçı güclə tutdu.

44-cü dəq. Mahir Şükürov cərimə meydançasına Vaqifi görür. Lakin Cavadova tərəf göndərilən topa rəqib müdafiəçi özünü güclə yetirib, təhlükəni sovuşdurur.

Birinci hissə başa çatdı.

Hakimin hissənin bitdiyini bildirən fiti səslənən kimi, almaniyalı azarkeşlər öz futbolçularını fitə basdılar. Görünür, onlar Almaniya milli komandasının oyunundan narazıdırlar.

İkinci hissə başlandı.

Yoahim Löv fasilədə iki dəyişiklik etdi. Andreas Bek Marsel Şaferi, Miroslav Kloze isə Mario Qomeşi əvəzlədi.

50-ci dəq. Samir Abbasov ikinci sarı vərəqə alaraq, meydandan qovuldu.

53-cü dəq. Kamran Miroslav Klozenin zərbəsini qaytardı.

54-cu dəq. Bu dəfə isə “duel”dən Kloze qalib ayrıldı. O, yaxın məsafədən topu tora qovuşdurdu.

58-ci dəq. Foqts ilk dəyişikliyə əl atdı. Yarımmüdafiəçi Vüqar Nadirovu Ernani Pereyra əvəzlədi.

66-cı dəq. Kloze daha bir qol vurdu. Cərimə meydançaslnda topu qəbul edən hücumçu bizə heç bir şans vermədi - 3:0.

71-ci dəq. “AWD-Arena”da darmadağın davam edir. Nəzarətsiz qalmış Podolski yaxın məsafədən hədəfi dəqiq nişan aldı.

81-ci dəq. Pereyra qapıçı ilə təkbətək gedən Klozeni yıxdı və sarı ilə cəzalandırıldı. Cərimə zərbəsi “canlı sədd”ə dəyib, geri qayıtdı.

86. Hesab arta bilərdi. Ancaq almanların yerinə yetirdiyi zərbə zərbəsini Kamran qapıdan keçməyə qoymur.

90. Hakim oyuna 3 dəqiqə əlavə edir.

Oyun başa çatdı.