Milli komandamız kimlərə 0:4 uduzur?

10.09.2009 - 11:16

Azərbaycan milli komandası Hannoverdə Almaniyaya məğlubiyyətlə tarixində beşinci dəfə 0:4 hesabı ilə uduzdu. Apasport.az saytının hesablamalarına görə, yığmamız bu hesabla ilk dəfə dünya çempionatının seçmə mərhələsində rəqibinə boyun əyib. Buna qədər 0:4 hesablı məğlubiyyətlər Avropa çempionatının seçmə mərhələ görüşlərinə təsadüf edib və həmin vaxt baş məşqçilər yerli mütəxəssislər olub.

Bu dəfə yığmamızın sükanı arxasında olan almaniyalı Berti Foqts eyni aqibətlə üzləşdi. Milli komandamız keçirdiyi yoldaşlıq görüşlərində konkret belə hesabla uduzmayıb. İlk 0:4-ü evdə alan yığmamız bundan sonra həmin hesabla bir qayda olaraq səfərdə yenilib.

İlk baxışdan nə qədər qəribə görünsə də, hər halda, milli komandamızın hesabında 4:0 hesablı qələbə də var və bu Avropa çempionatının seçmə mərhələsində (2000-ci il) baş verib. Əhməd Ələsgərovun baş məşqçisi olduğu yığmamız 1999-cu il iyunun 5-də Tofiq Bəhramov adına Respublika stadionunda Lixtenşteynin qapısından 4 cavabsız top keçirib.

Ancaq bu görüşdən cəmi 4 gün sonra Ələsgərovun komandası Rumıniya ilə səfər oyununda eyni aqibətlə üzləşib. Lixtenşteynlə Bakıdakı həmin oyun futbol tariximizə düşüb. Məsələ ondadır ki, həmin 4:0 17 illik tarixi olan milli komandamızın rəsmi oyunlarda yeganə böyük hesablı qələbəsidir.

Azərbaycan milli komandasının 0:4 hesablı məğlubiyyətləri

10 oktyabr 1998-ci il. Bakı. 2000-ci il Avropa çempionatının seçmə mərhələ oyunları. Azərbaycan – Macarıstan 0:4
Baş məşqçi: Vaqif Sadıqov

9 iyun 1999-cu il. Buxarest. 2000-ci il Avropa çempionatının seçmə mərhələ oyunu.
Rumıniya – Azərbaycan 4:0
Baş məşqçi: Əhməd Ələsgərov

29 mart 2003-cü il. Kardiff. 2004-cü ilin Avropa çempionatının seçmə mərhələ oyunu.
Uels - Azərbaycan 4:0
Baş məşqçi: Əsgər Abdullayev

11 oktyabr 2003-cü il. Reco di Kalabriya. 2004-cü ilin Avropa çempionatının seçmə mərhələ oyunu. İtaliya – Azərbaycan 4:0
Baş məşqçi: Əsgər Abdullayev

9 sentyabr 2009-cu il. Hannover. 2010-cu il dünya çempionatının seçmə mərhələ oyunu. Almaniya – Azərbaycan – 4:0
Baş məşqçi: Berti Foqts (Almaniya)