“Bu gün qələbə qazanmağı hədəfə almışdıq. Ancaq təəssüf ki, buna nail olub, “altılığ”a düşməyimizi rəsmiləşdirə bilmədik”. Apasport.az saytının məlumatına görə, bu fikirləri “Qəbələ” klubunun baş məşqçisi Ramiz Məmmədov Unibank Premyer Liqasının XXI turu çərçivəsində “Muğan”la səfər oyunundan (0:0) sonra keçirdiyi mətbuat konfransında deyib.

“Altılığ”a düşməsini son tura saxlayan “Qəbələ”nin çalışdırıcısı şəraitdən gileylənib: “Qazonun yaş olması oyunumuza öz təsirini göstərdi. Ancaq bununla belə, qələbə qazanmalı idik və Salyana da elə buna görə gəlmişdik. İkinci hissədə rəqibin futbolçusu meydandan qovulduğu üçün azlıqda keçirdi. Bu zaman üstünlük qazansaq da, bunu qol vuraraq, qələbəyə çevirə bilmədik”.

Məmmədovun bosniyalı həmkarı Almir Hurtiç isə yetirmələrini tərifləyib. “Muğan”ın çalışdırıcı komandanın oyunundan və nəticədən razı qaldığını bildirib: “Bu gün futbolçularımız istədiyim oyunu nümayiş etdirdi. Hər iki hissədə yaxşı təsir bağışladıq. Hələ fasiləyədək bir-iki epizodda qol imkanımız olsa da, bundan yararlana bilmədik. Futbolçumuz Tagim Novruzovun ikinci sarı vərəqəni alıb, meydandan qovulduğu üçün ikinci hissədə azlıqda oynamalı olduq. Ancaq komandamız bu çətin vəziyyətdən üzüağ çıxa bildi. 10 nəfərlə qalsaq da, rəqiblə başabaş mübarizə apara bildik. Hətta azlıqda qalanda da “Qəbələ”yə qol vura bilərdik”.

• Piolinin yeni komandası müəyyənləşib
• “Sabah”ın rəqibi qapıçısı ilə yollarını ayırıb
• Almaniya millisinin forvardı “Başakşəhər”in formasını geyinəcək - RƏSMİ
• PSV-nin futbolçusu “Bayer”də
• Premyer Liqa klubundan 64 milyonluq transfer - RƏSMİ