Futbolun inkişafı üçün tədbirlər proqramını davam etdirən AFFA növbəti “Top festivalı”nı keçirib. Apasport.az saytının məlumatına görə, bu dəfə tədbir Sumqayıtda təşkil olunub. UEFA-nın kütləvi futbol proqramına uyğun olaraq keçirilən festival assosiasiya ilə “Hyundai Auto Azerbaijan” şirkətinin birgə təşkilatçılığı ilə baş tutub.

Üzeyir Hacıbəyov adına “Kimyaçı” Mədəniyyət Sarayının qarşısında gerçəkləşən “Top festivalı”nın aparıcısı Nəsib Nur müsabiqədə iştirak etmək üçün 280 uşağın qeydiyyatdan keçdiyini, analoji tədbirlərin daha əvvəl Bakıda, Gəncədə, Lənkəranda təşkil olunduğunu bildirib. Tədbirdə Sumqayıt şəhər icra hakimiyyətinin başçısı Vaqif Əliyev, AFFA-nın baş katibi Elxan Məmmədov və “Azərkimya” İstehsalat Birliyinin baş direktoru Muxtar Babayev çıxış edərək, ölkəmizdə futbolun kütləviliyinin artırılması üçün məqsədyönlü işlər görüldüyünü, “Top Festivalı”nın da bu qəbildən olan tədbirlərdən olduğunu bildiriblər.

Çıxışlar başa çatdıqdan sonra münsiflər heyətinin üzvləri təqdim olunub. Məlum olub ki, iştirakçıların çıxışını Regional Futbol Federasiyaları İctimai Birliyinin vitse-prezidenti Maşallah Əhmədov, Sumqayıt şəhər Gənclər və İdman İdarəsinin rəisi Musa Həsənov, “Azərkimya” İstehsalat Birliyinin nümayəndəsi Eldar Məmmədov, Azərbaycanın əməkdar məşqçisi Səyavuş İbrahimov və Şimal Regional Futbol Federasiyasının prezidenti Yaşar Şamilov qiymətləndirəcək.

Ümumittifaq dərəcəli hakim Rüstəm Rəhimov yarışın qaydaları barədə ətraflı məlumat verdikdən sonra iştirakçılar topla davranış məharətlərini nümayiş etdirməyə başlayıblar.
Tədbiri izləyənlər arasında FİFA-nın Avropada futbolun inkişafı üzrə meneceri Yeva Paskue, FİFA-nın Qadın Futbolu Komitəsinin üzvü Mişel Koks və 15 yaşadək qızlardan ibarət Azərbaycan yığmasının baş məşqçisi Sissi Rayt da olub. Festival iştirakçıları və qonaqlar ölkəmizi “Eurovision-2009” müsabiqəsində təmsil etmiş Aysel Teymurzadənin çıxışını da izləmək imkanı qazanıblar.

Gərgin mübarizədən sonra “Top Festivalı”nın qalibi adını Tural Bayramlı qazanıb. 2-ci yeri Ramil Orucov, 3-cü yeri isə Ülvi Bayramlı tutub. Qızlar arasında yarışın qalibi Nərminə İsmayılova olub.

Yarış başa çatdıqdan sonra qaliblərə AFFA-nın, “Hyundai Auto Azerbaijan”ın və Azərbaycan Respublikası Dövlət Neft Şirkətinin mükafatları təqdim olunub.

Mənbə: affa.az

• Məhşur qapıçının oğlu "Fulhem"də - Rəsmi
• “Fənərbaxça”dan Trossard bombası
• Orkun Kökçü vətəninə gəlir: "Sadəcə "Beşiktaş”
• Ronaldonun muzeyi açılıb
• Sabiq "Neftçi"linin yeni klubu bəlli olub