Azərbaycan milli komandasının futbolçusu Elvin Məmmədov Branimir Subaşiçlə Zaur Tağızadəyə çatıb. Apasport.az saytının məlumatına görə, 22 yaşlı hücumameylli yarımmüdafiəçi Bakının “Neftçi” klubunda birgə oynamış, hazırda isə yığmadan kənarda qalan futbolçuların qol göstəricisini təkrarlayıb. Ancaq Elvinin Branimirlə Zaurdan yığmada üstün olan cəhəti var. Məsələ ondadır ki, Məmmədov həmin 6 qolu onlardan az oyunda vurub. Ümumiyyətlə, Elvin orta məhsuldarlıqda ən yüksək göstəricilərə görə malik futbolçulardandır. Buna görə də onun bombardirlər siyahısında daha iki pillə irəliləyərək, 2-ci yerə yüksəldiyini deməliyik.

İndi Məmmədova klubundakı baş məşqçisinə çatmaq qalır. Belə ki, “Qarabağ”ın 38 yaşlı çalışdırıcısı Qurban Qurbanov milli komandamızın 18 illik tarixində ən sərrast oyunçudur. Baş məşqçisindən 8 qol geridə qalan Elvinin belə gedişlə nəinki Qurbanova çatmaq, hətta onu ötmək şansı kifayət qədər realdır.

Qeyd edək ki, yığmamızın Avstriyada keçirdiyi yoldaşlıq görüşlərində vurduğu hər iki qolun müəllifi Elvindir.

Azərbaycan milli komandasında 5 və daha çox qol vuranlar

yer	futbolçu	oyun	qol
1	Qurban Qurbanov	67	14
2	Elvin Məmmədov	20	6
3	Branimir Subaşiç	26	6
4	Zaur Tağızadə	40	6
5	Nazim Süleymanov	24	5
6	Vaqif Cavadov	28	5
7	Fərrux İsmayılov	34	5
8	Vidadi Rzayev	38	5
9	Vyaçeslav Lıçkin	45	5

Mehman SÜLEYMANOV

• Ronaldo: “Tezliklə karyeramı başa vuracağam”
• Flik "Barselona"dan ayrılmaq istəyir
• "Arsenal" ardıcıl 8 oyundur qol buraxmır
• ÇL: Tarixin ən gənc futbolçusu oldu
• Millimizin üzvü oynamadı, komandası heç-heçə etdi