Azərbaycanlı futbolçular ilk dəfə legionerlərdən üstün oldu

24.12.2010 - 15:57

Azərbaycan Premyer Liqasında rekord qeydə alınıb. Apasport.az saytının hesablamalarına görə, bu ilin son turunda yerli futbolçular legionerlərdən çox qol vurub. Bu, ilk dəfə baş verdi və azərbaycanlı azarkeşlər bunu 19 tur gözləməli oldu.
Arxada qalan 18 turda bizimkilərlə əcnəbilər arasında qol sayəsində hətta bərabərlik olmamışdı. Nəhayət, tilsim ilin sonunda qırıldı. Son turda qapılardan 13 top keçdi ki, bunun 9-u futbolçularımız, 4-ü legionerlər vurdu. Göründüyü kimi, Gəlmələr üzərində aşkar üstünlüyümüzü diqqət çəkir.
Əcnəbilərdən qol müəllifləri Jaba (Braziliya, “Bakı”), Emil Mpenza (Belçika, “Neftçi”), İlya Kandelaki (Gürcüstan, “İnter”), Ekrem Hodziçdir (Bosniya və Herseqovina, “Muğan”). Futbolçularımızdan Rauf Əliyevlə (“Qarabağ”) Elşən Məmmədov (“Muğan”) hərəyə 2, Alim Qurbanov (“Xəzər Lənkəran”), Vüsal Qarayev (AZAL), Rəşad Abdullayev (“Neftçi”), Samir Əliyev (“Simurq”), Orxan Babayev (MOİK) 1 qol vurublar. İlk dəfə olaraq bu turda iki yerli oyunçu dubl edib.
Qeyd edək ki, qol vuranlar arasında milliləşdirilən legionerləri əcnəbi kimi saymışıq.

Premyer Liqada turlarda vurulan qollar
I tur – 18 qol (5 yerli, 13 legioner)
II tur – 10 qol (4 yerli, 6 legioner)
III tur – 12 qol (2 yerli, 10 legioner)
IV tur – 11 qol (2 yerli, 9 legioner)
V tur – 11 qol (2 yerli, 9 legioner)
VI tur – 9 qol (4 yerli, 5 legioner)
VII tur – 12 qol (5 yerli, 7 legioner)
VIII tur – 12 qol (5 yerli, 7 legioner)
IX tur – 24 qol (7 yerli, 17 legioner)
X tur – 13 qol (4 yerli, 9 legioner)
XI tur – 8 qol (1 yerli, 7 legioner)
XII tur – 11 qol (3 yerli, 8 legioner)
XIII tur – 11 qol (4 yerli, 7 legioner)
XIV tur – 11 qol (2 yerli, 9 legioner)
XV tur – 12 qol (3 yerli, 9 legioner)
XVI tur – 11 qol (4 yerli, 7 legioner)
XVII tur – 8 qol (2 yerli, 6 legioner)
XVIII tur – 17 qol (5 yerli, 12 legioner)
XIX tur – 13 qol (9 yerli, 4 legioner)

Mehman SÜLEYMANOV