“Qəbələ”nin 14 yaşa qədər futbolçulardan ibarət komandası İngiltərənin tanınmış klublarını təmsil edən yaşıdları ilə yoldaşlıq oyunları keçirmək və Avropa futbolu ilə yaxından tanış olmaq məqsədilə fevralın 6-da Liverpul şəhərinə səfər edib. Apasport.az saytının məlumatına görə, bu gün “Mançester Yunayted”lə qarşılaşacaq təmsilçimiz dünən Liverpulda matç öncəsi son məşqinə çıxıb.

Qarşılaşma Bakı vaxtı ilə saat 22:45-də “Qırmızı şeytanlar”ın əsas komandasının məşq etdiyi Karringtonda baş tutacaq. “Qəbələ” “Mançester Yunayted”, “Liverpul”, “Everton”, “Blekbern” və “Şeffild Yunayted” kimi tanınmış və köklü klublarla üz-üzə gələcək ilk klubumuz kimi Azərbaycan futbol tarixinə adını yazdıracaq.

Azyaşlılarımız İngiltərədə təkcə futbol oynamaqla kifayətlənməyəcəklər. Belə ki, yerli medianın diqqət mərkəzinə düşən “Qəbələ” “Mersisayd” Radio-dan dəvət alıb. Bu gün gündüz saatlarında 2 futbolçumuz radionun qonağı olacaq və dinləyiciləri “Qəbələ”, Azərbaycan və Azərbaycan futbolu haqqında məlumatlandıracaqlar. Futbolçularımızın ölkəmizi tanıtmaq məqsədilə bir neçə belə tədbirdə iştirakı gözlənilir.

Qeyd edək ki, “Qəbələ” İngiltərədə 5 matç keçirəcək. Bu gün “Mançester Yunayted”, sabah “Everton”la görüşəcək komanda fevralın 10-da “Liverpul”, 12-də “Blekbern”, 14-də “Şeffild Yunayted”lə üz-üzə gələcək.

• Ernandesdən "Milan" qərarı
• Dalota İspaniyadan müştəri
• "Bavariya" Noyerə iki əvəzləyici tapıb
• “Arsenal”dan Çempionşipə
• “Torino”da yeni müqavilə