“Yeni transfer etdiyimiz legionerlərin çıxış etdikləri sonuncu çempionatlar noyabr ayında başa çatıb. Onlar klubun hazırlığına qoşulanda müəyyən problemlər var idi”. Apasport.az saytının xəbərinə görə, bunu AZAL klubunun baş məşqçisi Nazim Süleymanov deyib.

Baş məşqçi heyətə cəlb edilən yeni oyunçularla bağlı fikrini açıqlayarkən, “Gəncə” ilə şənbə günü keçiriləcək çempionat oyununda onlardan bir neçəsinə şans verəcəyini bildirib: “Hazırda yeni oyunçulardan ikisində artıq çəki var. Amma buna baxmayaraq, “Gəncə” ilə qarşılaşmada onlardan bir neçəsinə şans verəcəm. Sadəcə, adlarını açıqlamaq istəmirəm”.

Süleymanov transfer zamanı yalnız futbolçuları texniki imkanlarına görə seçmədiklərini də vurğulayıb: “Yeni futbolçularımız komandaya uyğunlaşıblar. Həm də biz futbolçu seçərkən, sırf texniki qabiliyyətini əsas götürmürük. Bu vacibdir, amma onun kollektivə nə dərəcədə uyğunlaşıb-uyğunlaşmadığını da nəzərə alırıq”.

Oyunöncəsi komandadaxili ab-havanın yaxşı olduğunu deyən mütəxəssis ancaq qələbə haqda düşünür: “Baxmayaraq ki, keçirdiyimiz son 4 oyundan cəmi 3 xal toplamışıq, amma ab-hava normaldır. Sistemi dəyişməyə gəldikdə, bunu rəqibə və futbolçulara görə edirik”.

• Ernandesdən "Milan" qərarı
• Dalota İspaniyadan müştəri
• "Bavariya" Noyerə iki əvəzləyici tapıb
• “Arsenal”dan Çempionşipə
• “Torino”da yeni müqavilə