Milli komandamız “Barselona” ilə qarşılaşacaq

01.04.2011 - 16:58

19 yaşadək futbolçulardan ibarət Azərbaycan yığmasının rəqibləri müəyyənləşib. Apasport.az-ın AFFA-nın rəsmi saytına istinadən məlumatına görə, İtaliyanın Olbia şəhərində beynəlxalq turnirdə iştirak edəcək Vəli Qasımovun yetirmələrinin qrup mərhələsində qarşılaşacağı komandaların adı açıqlanıb. Aprelin 18-24-da baş tutacaq yarışda yığmamız İspaniyanın “Barselona” və İtaliyanın “Napoli” komandaları ilə mübarizə aparacaq.

Qeyd edək ki, ötən il də analoji yarışa qatılan U-19 1/4 finalda mübarizəni dayandırmışdılar. Onlar İngiltərənin «Kuin Park Reyncers» klubuna penalti seriyasında uduzmuşdular.