Ən yaxşı çempion - “Neftçi”, amma indiki yox!

04.05.2011 - 14:35

“Neftçi” 6 illik həsrətə son qoymaqla, ölkə çempionluğunu qazandı. 6 ildən sonra əldə olunan bu uğur çoxlarının gözünü bağlasa da, turnir cədvəlində heç də göz oxşamayan məqam diqqət çəkir. Bu da məhsuldarlıqla bağlıdır.

Apasport.az saytının hesablamalarına görə, cari mövsümdə Premyer Liqada hamıdan çox qol vuran “Neftçi” orta hesabla hər oyunda 2-dən də az fərqlənib. Bu, Azərbaycan çempionatları tarixində 5-ci belə haldır ki, qızıl medalların sahibi hər matçda 2-dən az qol sevinci yaşayır. Bunların da 4-ü son 7 ildə qeydə alınıb ki, onların hamısında da paytaxt klubları azla çoxa nail olublar. Bakılılar 2 həddinə çatmaq üçün son 3 qarşılaşmada 12 dəfə fərqlənməlidirlər. Bu isə heç ağlabatan deyil.

Mütləq antirekord isə “Qarabağ”a məxsusdur. 1993-cü ildə ağdamlılar az qala hər matçda 1 qol vura-vura, qızla sahib çıxıblar.

Çempionatlar tariximizdə ən yaxşı hücum xəttinə malik komanda isə sözsüz ki, “Neftçi”dir. Bakılılar 2 dəfə 3 qol həddini də aşıb. 1992-ci ildə ümumi qollarının sayında 100-ü adlasa da, orta məhsuldarlıqda 1996/97 mövsümündə tarix yazıb. 14 il əvvəlki nailiyyət “Qarabağ”ın antirekordundan 3, “Neftçi”nin indiki göstəricisindən təxminən 2 dəfə çoxdur.

“Neftçi” iki tarixi göstərici ilə yanaşı, “Şəmkir” də 1 dəfə orta hesabla 3 qol həddini aşıb. Bu, 2000/01 mövsümündə qeydə alınıb. Bir sözlə, 18 çempiondan 3-ü 3 həddini keçib, 5-i 2-dən aşağıda qalıbsa, 10 komanda 2 ilə 3 aralığında var-gəl edib.

mövsüm	çempion	oyun	vurub	məhsuldarlıq
1996/97	Neftçi	30	98	3,27
1992	Neftçi	34	104	3,06
2000/01	Şəmkir	20	61	3,05
1994/95	Kəpəz	23	62	2,7
1998/99	Kəpəz	35	91	2,6
1997/98	Kəpəz	24	61	2,54
2003/04	Neftçi	25	62	2,48
1993/94	Turan	30	74	2,47
1999/00	Şəmkir	21	46	2,19
2007/08	İnter	26	55	2,12
2006/07	Xəzər Lənkəran	24	50	2,08
2008/09	Bakı	26	54	2,08
1995/96	Neftçi	30	60	2
2010/11	Neftçi	29	52	1,79
2005/06	Bakı	26	42	1,62
2009/10	İnter	32	47	1,47
2004/05	Neftçi	34	49	1,44
1993	Qarabağ	18	19	1,06