1083 gündən sonra

29.09.2011 - 23:02

17 yaşadək qızlardan ibarət Azərbaycan millisi 3 illik fasilədən sonra Avropa çempionatına qatılır. Apasport.az saytının məlumatına görə, 2007/08 mövsümdə keçirilən ilk yarışın iştirakçısı olan komandamız növbəti çempionata qatıldıqdan sonra birinciliklərə qatılmırdı.

Həm 2007/08, həm də 2008/09 mövsümlərində Şamil Heydərobun rəhbərliyi altında 1-ci seçmə mərhələdə mübarizəni dayandıran yığmamız almaniyalı baş məşqçisi Sissi Raytın rəhbərliyi altında rəsmi debüt edəcək. Sabah Ukrayna ilə baş tutacaq görüş millimizin Avropa səhnəsindəki 1083 günlük həsrətinə son qoyacaq. Belə ki, komandamız sonuncu dəfə 2008-ci il oktyabrın 12-də İslandiya ilə qarşılaşmışdı.

1083 gündən sonra meydana çıxıb, ilk dəfə Azərbaycanda oynayacaq millimiz üçün Sissi Raytın debütü xoşbəxt rəqəm kimi sayılan 7-ci matçda qeyd olunacaq. Komandamız 3-cü cəhdə qədər 1 qələbə qazanıb, 1 heç-heçə edib və 4 dəfə məğlub olub. İndiyədək 3 qol vuran millimiz 16 top buraxıb.

Yığmamız Avropa çempionatının seçmə mərhələlərində

mövsüm	Baş məşqçi	yer	oyunlar
2007/08	Şamil Heydərov	Polşa	Hollandiya 0:2, Polşa 0:4, Yunanıstan 2:1
2008/09	Şamil Heydərov	İtaliya	Italiya 1:3, Fransa 0:6, İslandiya 0:0
2011/12	Sissi Rayt	Azərbaycan	Ukrayna, Bosniya və Herseqovina, İspaniya

Azərbaycan yığmasının 3-cü dəfə qatıldığı qitə birinciliyi sayca 5-ci Avropa çempionatıdır. Ənənəvi olaraq, həmişə final mərhələsi İsveçrədə keçirilən yarışda yalnız 2 komanda çempion adını qazanıb. Son 3 ildə daim finalda oynayan İspaniya ilk cəhddə uduzsa da, ardıcıl 3-cü titulun arzusundadır. İlk 2 çempionatın qalibi Almaniya isə son 2 yarışda bürünclə kifayətlənib.

il	çempion	II yer	III yer
2007/08	Almaniya	Fransa	Danimarka
2008/09	Almaniya	İspaniya	Fransa
2009/10	İspaniya	İrlandiya	Almaniya
2010/11	İspaniya	Fransa	Almaniya
2011/12

Qeyd edək ki, 4 komandanın qatılacağı İsveçrədəki final mərhələsində ilk 3 yeri tutan yığmalar gələn il Azərbaycanda keçiriləcək dünya çempionatına vəsiqə qazanır.