2 pillə irəliləmək şansı əldən getdi

02.08.2012 - 12:02

UEFA-nın 2008-13-cü illəri əhatə edən reytinq siyahısında dəyişikliklər olub. Apasport.az saytının məlumatına görə, 2012/13 mövsümünün Çempionlar Liqasının III təsnifat mərhələsinin ilk oyunlarında bəzi ölkələr xal hesablarını dəyişə bilib.

Mərhələnin oyunları Azərbaycanın da yer aldığı 4-cü onluq komandaları üçün uğursuz alınıb. Belə ki, yalnız 31-ci pillədəki Sloveniya qələbə sayəsində mövqeyini möhkəmlədib. Digər 9 ölkənin xal hesabı isə dəyişməz qalıb. Onlar arasında Azərbaycan da var. Çempionumuz “Neftçi”nin İsraildə Kiryat-Şmona “Hapoel”inə 0:4 hesabı ilə uduzması mövqeyimizin yaxşılaşmasına imkan verməyib.

Hərçənd, “Neftçi”nin səfər qələbəsi 2 pillə irəliləməyə imkan verəcəkdi. Lakin bakılılar bu işin öhdəsindən gəlməyib. Əks halda, Azərbaycan indi 36-cı deyil, 34-cü olacaqdı.

Son 5 mövsümü əhatə edən reytinqə Azərbaycan bu mövsüm hesabına 1,750 xal əlavə edib. Bunun ən böyük hissəsi – 0,750-i “İnter”ın payına düşür. “Xəzər Lənkəran” 0,500, “Neftçi” isə “İnter”in topladığının yarısını - 0,375, “Bakı” isə cəmi 0,125 xal qazanıb. Son 5 ildə isə 7,291 xal yığmışıq.

UEFA reytinqinin 4-cü onluğu

yer	Ölkə	reytinq	Qalıb/klub
31	Sloveniya	8,458	2/4
32	Finlandiya	8,208	2/5
33	Bosniya-Herseqovina	7,583	1/4
34	Moldova	7,541	1/4
35	İrlandiya	7,375	1/4
36	Azərbaycan	7,291	1/4
37	Litva	6,500	1/4
38	Qazaxıstan	5,958	1/4
39	Latviya	5,791	0/4
40	İslandiya	5,416	0/4