Barışmaz rəqibi “Xəzər Lənkəran”a çatdı, Azərbaycan irəlilədi

09.08.2012 - 10:49

UEFA-nın 2008-13-cü illəri əhatə edən reytinq siyahısında dəyişikliklər olub. Apasport.az saytının məlumatına görə, 2012/13 mövsümünün Çempionlar Liqasının III təsnifat mərhələsinin cavab oyunlarında bəzi ölkələr xal hesablarını dəyişə bilib.

Son 5 mövsümü əhatə edən reytinqə Azərbaycan hesabına daha 0,125 xal yazıb. Bu, “Neftçi”nin İsrail çempionu “Hapoel” (Kiryat-Şmona) ilə heç-heçə etməsi sayəsində mümkün olub – 2:2. Bununla, cari mövsüm qazanılan xallarımızın sayı 1,875-ə çatıb.

Bunun ən böyük hissəsi – 0,750-si “İnter”ın payına düşür. Azərbaycana yarım xal bəxş edən “Xəzər Lənkəran”a çatan “Neftçi” də 0,500 qazanıb. “Bakı” isə cəmi 0,125 xal qazanıb.

“Neftçi”nin heç-heçəsi sayəsində son 5 ilə əsasən 7,416 xal yığmağımıza imkan verib. Bunun da sayəsində Azərbaycan İrlandiyanı arxada qoyaraq 35-ci pilləyə yüksəlib. Bir pillə irəliləyiş daha artıq ola bilərdi.

Belə ki, 34-cü olan Moldova ilə 0,125 xallıq fərqi aradan qaldırma üçün “Neftçi”nin qələbəsi yetərli idi. Lakin bu baş vermədi.

UEFA reytinqinin 4-cü onluğu

yer	Ölkə	reytinq	Qalıb/klub
31	Gürcüstan	8,916	1/4
32	Finlandiya	8,408	2/5
33	Bosniya-Herseqovina	7,833	1/4
34	Moldova	7,541	1/4
35	Azərbaycan	7,416	1/4
36	İrlandiya	7,375	1/4
37	Litva	6,500	1/4
38	Qazaxıstan	5,958	1/4
39	Latviya	5,791	0/4
40	İslandiya	5,416	0/4