AZAL rekordunu təkrarladı, “Qarabağ”dan antirekord

17.09.2012 - 11:32

Azərbaycan Premyer Liqasının V turunun ən gözlənilməz nəticəsi AZAL – “Qarabağ” matçına təsadüf etdi. Apasport.az-ın PFL-il rəsmi saytına istinadən məlumatına görə, bu turadək ilk 2 pillədə qərarlaşan komandaların oyununda hər 2 tərəfin qələbəsi gözlənilən olsa da, böyük hesablı nəticə tura rəng qatdı. 8 qolun vurulduğu matçda AZAL-ın 6:2 hesabı ilə qalib gəlməsi ilə hər 2 klub üçün tarixi nəticə əldə olundu.

“Qarabağ” tarixində 6-cı dəfə 4 top fərqi ilə məğlub oldu. Antirekordunu təkrarlayan komanda əvvəllər 5 dəfə belə ağır yenilgi almışdı. Sonuncu dəfə buna 7 il, daha dəqiqi 2692 gün əvvəl təsadüf olunmuşdu.

21.11.1999	Qarabağ (Ağdam) - Şəmkir	1 - 5
24.09.2000	Şəmkir - Qarabağ (Ağdam)	5 - 1
04.11.2000	Qarabağ (Ağdam) - Neftçi (Bakı)	0 - 4
22.09.2001	Şəmkir - Qarabağ-Azərsun (Ağdam)	5 - 1
24.05.2005	Turan (Tovuz) - Qarabağ (Ağdam)	4 - 0

“Qarabağ” tarixində ilk dəfə Azərbaycan çempionatında 6 qol buraxdı. İndiyədək ən pis halda ağdamlılar 5 qolla uduzmuşdu. Bu da 20 ildə cəmi 4 dəfə yaşanmışdı. Sonuncu belə hal 11 il və ya 4012 gün öncə baş vermişdi.

21.11.1999	Qarabağ (Ağdam) - Şəmkir	1 - 5
24.09.2000	Şəmkir - Qarabağ (Ağdam)	5 - 1
05.05.2001	Qarabağ (Ağdam) - Turan (Tovuz)	2 - 5
22.09.2001	Şəmkir - Qarabağ-Azərsun (Ağdam)	5 - 1

AZAL Premyer Liqada özünün ən böyük hesablı qələbəsini qazanmağa yaxın olsa da oyunun sonunda buraxılan 2 qolla rekorddan uzaq düşdü. Belə ki, “təyyarəçilər” 2 dəfə 5 top fərqi ilə də qalib gəlib.