“Xəzər Lənkəran”la oyunun hazırlıqlarına davam

25.02.2013 - 18:27

“Rəvan” ötən həftənin cümə günü Topaz Premyer Liqasının XXI turu çərçivəsində oyununu keçirdikdən dərhal sonra növbəti matç barədə düşünməyə başlayıb. Apasport.az saytının məlumatına görə, komanda fevralın 27-də Azərbaycan Kubokunun 1/4 finalının ilk görüşündə üz-üzə gələcəyi “Xəzər Lənkəran”la qarşılaşmaya ciddi hazırlaşır.

“Rəvan” həmin matça hazırlıq çərçivəsində bu gün artıq ikinci məşqini keçirib. Ənənəvi olaraq “Bayıl Arena”da toplaşan komanda mərhələ adlamaq üçün ilk oyunda sərfəli nəticəyə ümid edir. Maraqlıdır ki, çempionatda 4 dəfə üz-üzə gəldiyi "Xəzər Lənkəran”la ilk dəfə kubokda görüşəcək. Bu da oyuna rəng qatacaq məqam olacaq.

Qeyd edək ki, “Rəvan” – “Xəzər Lənkəran” matçı saat 17:00-da başlayacaq.