Türkiyənin I dəstəsində mübarizə aparan “Qaziantep BB” klubunun baş məşqçisi Nurullah Sağlamın apasport.az saytına müsahibəsi

- Azərbaycanlı futbolçu Vaqif Cavadovla 2 illik müqavilə bağladınız. Bu transferi necə həyata keçirdiniz?
- Bildiyiniz kimi, mən “Mersin İdman Yurdu”nda da çalışmışam. Onda köməkçilərimdən biri Hindal Gündüz idi. O, Güvənç Kurtarla birgə ötən mövsüm Azərbaycanda işləyib. Bu futbolçu haqqında ən yaxşı informasiyaları məhz ondan aldıq.

- Bəs Vaqifin millidə və ya “İnter”də keçirdiyi oyunları izləmədinizmi?
- Canlı yox, ancaq disk vasitəsilə izlədim.

- Adətən diskdən izlənilən oyunçular bəzən real həyatda özünü doğrultmur. Buna görə heç tərəddüd etmədinizmi?
- Necə tərəddüd edə bilərəm ki? Bayaq dediyim kimi, keçmiş köməkçim onun oyununa bəlkə azı 15 dəfə canlı baxıb. Hindal Gündüz mənim çox güvəndiyim adamlardan biridir.

- Vaqifi hansı mövqedə oynatmaq fikriniz var?
- Son vaxtlar oynadığı mövqedə. Sol cinah hücumçusu kimi onu oynatmağı düşünürük. Ancaq alternativ olaraq mərkəz forvardı kimi də oynada bilərik.

- Hazırlıqlarınızı deyəsən, ancaq Türkiyədə edəcəksiniz...
- Bəli. İyulun 10-dan bazamızda hazırlıqlara başlayacağıq. İyulun 31-dən isə “Fənərbaxça”nın Düzcə yaylasındakı bazasında avqustun 15-dək hazırlıq keçəcəyik. Orda 6 yoxlama oyunu keçirməyi düşünürük. 

- Transfer hədəfinizdə başqa azərbaycanlı futbolçu da varmı?
- Var. Ancaq adını söyləyə bilmərəm. Bunu söyləsəm, transfer olmaz. Onun klubunun adını da deyə bilmərəm.

- O, sizinlə müqavilə bağlamağa yaxındırmı?
- Yaxındır. Ancaq gənc oyunçu olduğu üçün klubu ilə bağlı məsələlər var. Hazırda onları həll etməyə çalışırıq.

- Yəni klubu bu transfer üçün sizdən pul istəyir?
- Bəli.

- Nə qədər pul ödəməlisiniz?
- Bilmirəm. Danışıqları klub prezidentimiz aparır. Mən bu futbolçunun adını ona təqdim edib özüm kənara çəkilmişəm.

- Sizin komandada millimizin başqa futbolçusu Ufuk Budak da ötən mövsüm çıxış edirdi. Onu komandadan göndərməmisiniz ki?
- Yox, bizimlə birgədir. Onun Türkiyə pasportu olduğu üçün hələ 1 azərbaycanlı almaq üçün imkanımız var.

Səbuhi TOFİQOĞLU

• Vinsen Abubakar "Hatayspor"da - RƏSMİ
• Filip Kostiç rəsmən "Fənərbaxça"da
• "Barselona"da yeni hücumçu
• “Qalatasaray” Ramosa təklif göndərdi
• Ən yaxşı italyan baş məşqçi bəlli olub