Sabah Topaz Premyer Liqasında mövsümün ikinci yarısına start veriləcək. Apasport.az saytının məlumatına görə, ölkənin ən güclü klubları çempionatdakı mübarizəni 40 günlük fasilədən sonra bərpa edəcək.

III dövrənin ilk turunun qarşılaşmaları iki gün ərzində baş tutacaq. 2016-cı ilin ilk oyun günündə iki qarşılaşma baş tutacaq. XIX turun açılış matçında turnir cədvəlinin ilk yarısında qərarlaşan “Kəpəz”lə “Qəbələ” üz-üzə gələcək. İlk yarıda iki dəfə Qəbələdə qarşılaşan komandalar bu dəfə Gəncədə münasibətlərinə aydınlıq gətirəcək. Qonaqlar ən azı 1 günlük 2-ci pilləyə yüksəlmək, meydan sahibləri isə rəqibini arxada qoymaq üçün qalib gəlməlidi. “Kəpəz” bu görüşdə cəzalı futbolçusu Tural Nərimanovun xidmətindən yararlana bilməyəcək.

Günün ikinci oyununda “Sumqayıt”ı sınağa çəkəcək “Neftçi” matça daha böyük itkilərlə çıxacaq. Erik Ramos, Kaue da Silva və Aylton Silvanın cəza üzündən buraxacağı qarşılaşmada 3 xal iddiasında olan bakılılar ilk yarıda olduğu kimi, rəqibini itkisiz keçməyə çalışacaq. “Ağ-qaralar” bunu bacarsa, irəliləyə də bilərlər. Lakin bunun üçün “Kəpəz” də xal itirməlidi. “Sumqayıt” isə AZAL-a yaxınlaşmaq üçün ölkənin ən titullu klubunu büdrətməlidi. Qonaqlar da bu görüşə cəzalı Emin Mehdiyevsiz çıxmalı olacaq.

Turun ikinci günü Lənkəranda başlayacaq. Turnir cədvəlinin aşağı pillələrində qərarlaşan “Xəzər Lənkəran”la “Rəvan” qələbə həsrətinə şəxsi oyunlarında son qoymaq üçün mübarizə aparacaq. Son 7 matçında uduzan cənublular doğma meydanda seriyanı qırmaq əzmindədi. Bu matç həm də Elbrus Məmmədovun baş məşqçi postuna qayıdışından sonra ilk matç olacaq. Hesabından 6 xal silindikdən sonra son pilləni tərk etmək şansları daha da azalan “Rəvan” zəifləmiş heyətlə sensasiyanı gerçəkləşdirməyə çalışacaq. Maliyyə çətinlikləri üzündən hətta çempionatı davam etdirməsi də sual altında olan bakılılar cəzalı Yamin Ağakərimzadənin də xidmətindən yararlana bilməyəcək.

Premyer Liqanın lideri “Qarabağ” AZAL-ın qonağı olacaq. Ağdam təmsilçisi 3 turluq qələbə həsrətini səfərdə qırmaq iddiasındadı. Əyalət klubu bununla da izləyiciləri ilə xal fərqinin azalmamağını təmin edəcək. “Təyyarəçilər” əksinə, qələbə seriyanı davam etdirməyə çalışacaq. Son 3 matçdakı qələbə ilə ilk “beşliy”ə yaxınlaşan paytaxt klubu “Qarabağ”la matçlardakı seriyanı da qırmaq arzusundadı. Belə ki, AZAL 8 görüşdü rəqibindən xal ala bilmir.

Tura paytaxt derbisi ilə yekun vurulacaq. İlk “üçlük”də qərarlaşan “Zirə” və “İnter” debütantın meydanında üz-üzə gələcək. İlk iki dövrədə qolsuz ayrılan bakılılar 2-ci yer uğrunda “döyüşəcək”. Hər iki komanda bu matça itki ilə çıxacaq. “Zirə” cəzalı Adil Nağıyevin xidmətindən məhrumdusa, “İnter” yeni transferi Kamran Ağayevə şans verə bilməyəcək. 2014-cü ilin qışında “Qəbələ”də oynadığı vaxt 3 matçlıq cəzalanan qapıçı hələ də bu durumdan çıxmayıb. 2015-ci ili iki qələbəylə başa vuran “bankirlər” seriyasına davam etdirmək əzmindədisə, zirəlilər meydan amilindən yararlanmaq istəyir.

Topaz Premyer Liqası

III dövrə, XIX tur

30 yanvar (şənbə)

14:00. “Kəpəz” – “Qəbələ”
Hakimlər: Fariz Yusifov, Vaqif Musayev, Nahid Əliyev, Ziya Nəsirov 

Mövsümün ilk yarısındakı oyunlar: 0:1, 2:1
Gəncə şəhər stadionu

16:30. “Neftçi” – “Sumqayıt”
Hakimlər: Əliyar Ağayev, Zeynal Zeynalov, Rza Məmmədov, Ramil Diniyev 
Mövsümün ilk yarısındakı oyunlar: 2:1, 2:1
8-ci km qəsəbə stadionu

31 yanvar (bazar)

13:30. “Xəzər Lənkəran” – “Rəvan”
Hakimlər: Ömər Paşayev, Namiq Hüseynov, Kamran Bayramov, İnqilab Məmmədov 
Mövsümün ilk yarısındakı oyunlar: 1:1, 1:0
“Xəzər Lənkəran” mərkəzi stadionu

15:00. AZAL – “Qarabağ”
Hakimlər: Rəhim Həsənov, Yaşar Abbasov, İsgəndər Əliyev, Rəvan Həmzəzadə
Mövsümün ilk yarısındakı oyunlar: 2:0, 2:0
AZAL Arena

17:30. “Zirə” – “İnter”
Hakimlər: Rauf Cabbarov, Mehman Mahmudov, Mübariz Haşımov, Elvin Əsgərov 
Mövsümün ilk yarısındakı oyunlar: 0:0, 0:0
Zirə  İdman Kompleksinin stadionu

* - “Rəvan”ın hesabından 6 xal silinib.

Bombardir: Riçard Almeyda (“Qarabağ”) – 7.

• Dzeko “1000”i geridə qoyub
• İlin ən yaxşı məşqçisi seçilib - Qvardiola 3-cü olub
• Joze Mourinyo hakimlik haqda: ”Belə bir şey görməmişəm”
• Arda Turan "Beşiktaş"a keçidi ilə bağlı: “Həmişə Qalatasaray”lı olduğumu söyləmişəm”
• Duşan Tadiç: "Kişi kimi məsuliyyəti boynumuza götürməliyik"