Topaz Premyer Liqasında oyunlar idarə edən 4 hakim I diviziona göndərilib. Apasport.az saytının məlumatına görə, bunlar arasında ən çox diqqət çəkən Rəhim Həsənovdu.
Cari mövsümdə Premyer Liqada ən çox oyun idarə edən FİFA referisi aprelin 15-də aşağı liqanın XXII turu çərçivəsində baş tutacaq “Bakılı” – “Şəmkir” görüşünə təyinat alıb.
Ötən turda “Sumqayıt” – “Qəbələ” qarşılaşmasının son dəqiqələrində qonaqların qapısına mübahisəli penalti təyin edən Ömər Paşayev də I diviziona “sürgün edilib”. Onunla birlikdə laysmanları Elman Musayev və Vüqar Bayramov aşağı liqaya göndəriliblər. Bu briqada aprelin 15-də “Neftçala” – “Zaqatala” oyununda ədalət təmsilçiləri olacaq.
Bundan başqa, Ramil Diniyev və digər FİFA hakimi Orxan Məmmədov da I divizionda oyun idarə edəcəklər. Onlar müvafiq olaraq “Qaradağ Lökbatan” – “Turan Tovuz” və “Şərurspor” – MOİK qarşılaşmasında fit çalacaqlar.
Hakim azlığı ucbatından Diniyev Lökbatandakı matçdan cəmi iki gün sonra Premyer Liqanın XXX turunun ən maraqlı qarşılaşmalarından biri hesab edilən “Neftçi” – “Qarabağ” oyununda baş hakim funksiyasını yerinə yetirəcək. Orxan Məmmədov da Azərbaycan derbisində 4-cü hakim olacaq.
Rəhim Həsənov isə aprelin 17-də “Zirə” – “Xəzər Lənkəran” görüşünün 4-cü hakimi kimi fəaliyyət göstərəcək.
Göründüyü kimi, I diviziona təyinat alan Premyer Liqa hakimlərindən yalnız Ömər Paşayev yüksək liqanın XXX turunda kənarda qalacaq. Bu isə onun “Sumqayıt” – “Qəbələ” oyunundakı səhvi ucbatından I diviziona göndərilməklə cəzalandırıldığı ehtimalını artırır.
Oxşar xəbərlər
Ana səhifə
Bütün xəbərlər