13 Aprel 12:29 5 qat dünya çempionumuz: Onu “sındırmaq” istəyirəm
DÖYÜŞ NÖVLƏRİ xəbərləri 13 Aprel 12:29
1011 baxış

5 qat dünya çempionumuz: Onu “sındırmaq” istəyirəm

“Döyüşün Bakıda keçirilməsi təklif olunmuşdu. Lakin ölkəmizdəki prezident seçkiləri və "Formula-1" yarışları səbəbindən alınmadı”. Apasport.az saytının məlumatına görə, bunu “Qəbələ” İdman Klubunun üzvü, peşəkar kikboksinq üzrə 5 qat dünya çempionu Pərviz Abdullayev deyib.

 

“Kobra” ləqəbi ilə tanınan döyüşçü aprelin 20-də Moskvada keçiriləcək mötəbər “ACB KB 15” turnirində mübarizə aparacaq. O, 77 kq çəki dərəcəsində dünya kəməri uğrunda çeçen əsilli Rusiya idmançısı İslam Baybatırovla gücünü yoxlayacaq. Bakıda keçirilən IV İslam Oyunlarının uşu-sanda üzrə bürünc mükafatçısı bu gün döyüşlə bağlı təşkil olunan mətbuat konfransında bildirib ki, səfərdə döyüşməyi sevir: "Kəmər uğrunda 5-ci qarşılaşmamdı. Bu dəfə 5 raund döyüşəcəm və bu həmişə çətin olur. Tam qüvvəmlə hazırlaşmışam. Qalib gəlmək üçün rəqibdən bir deyil, iki dəfə güclü olmalısan. Döyüş üçün 2 aydan artıqdı hazırlıq keçmişəm. Yoxlama döyüşlərim olub. Bakıda və Qəbələdə təlim-məşq toplanışlarım olub. Hücum döyüşünü sevirəm. Bu dəfə də elə olacaq".

 

Döyüşçümüz rəqibi haqda lazımı məlumatlar topladığını da qeyd edib: "Son 6 qarşılaşmasını nokautla udub. Amma özümə güvənirəm və hücumla onu “sındırmaq” istəyirəm".

 

O, bu döyüşdən sonra yenidən "Qlory"də döyüşəcəyinə inam ifadə edib. Abdullayev məğlub olduğu rəqiblərdən türkiyəli Adəm Bozkurtla yenidən qarşılaşmaq ehtimalının olduğunu da söyləyib.

 

"Qəbələ" İK-nın digər idman növləri üzrə koordinatoru Səbuhi Qarayev Abdullayevin uğurlarından danışıb və klubda bütün növlərə diqqət ayrıldığını vurğulayıb. Abdullayevin meneceri Faiq Abdullayev isə Moskvada Azərbaycan diasporunun Pərvizə dəstək olduğunu deyib.

 

Qeyd edək ki, bu qarşılaşma Abdullayevin peşəkar karyerasındakı 53-cü döyüşü olacaq. O, öncə keçirdiyi döyüşlərdə 22-si nokautla olmaqla, 46 qələbə qazanıb.

Xəbər lenti