“Baş məşqçi mənə etimad göstərib, ilk dəqiqələrdən meydanda olmaq üçün şans verdi. Təəssüf ki, bu qarşılaşmadan məğlub ayrıldıq. 90 dəqiqə daha üstün oyun nümayiş etdirdik”. Apasport.az saytının məlumatına görə, bunu “Qəbələ”nin futbolçusu Vaqif Cavadov deyib.

Topaz Premyer Liqasının XI turunun “Kəpəz”lə oyunu bu yay heyətinə qatdığı yarımmüdafiəçi üçün əlamətdar olub. Bundan əvvəlki turda meydana sonradan çıxan Cavadov ilk dəfə “qırmızı-qaralar”ın start heyətində yer alıb. 26 yaşlı futbolçu qarşılaşma haqda fikirlərini gabalafc.az saytına açıqlayıb: “Rəqib qapısına hücumlar təşkil edib, qol imkanları yaratsaq da, sonda qol buraxaraq uduzduq. Artıq neçə görüşdü üstünlük bizdə olsa da, qalib gələ bilmirik. Lakin hələ qarşıda oyunlarımız var. Hər şey qaydasına düşəcək. Hücumlarımız zamanı bizim də müəyyən səhvlərimiz olur. Onları da aradan qaldıracağıq. Öz oyunuma gəlincə, bunu dəyərləndirmək istəməzdim. Həmişə klubum üçün, millidə isə yığmamız üçün oynamışam. Buna qiyməti isə mütəxəssislər versinlər”.

“Qəbələ” UEFA Avropa Liqasının IV turunun noyabrın 5-də keçiriləcək oyununda Dortmund “Borussiya”sı ilə qarşılaşacaq. “Qırmızı-qaralar”ın heyətində avrokuboklarda hələlik meydana çıxmayan Cavadov Almaniya təmsilçisi ilə görüşlə bağlı fikirlərini açıqlayıb: “Borussiya” ilə oyuna səylə hazırlaşırıq. Bütün komandamız bu matça köklənib. Çox çətin oyun olacaq. Lakin biz Dortmunda məğlub olmağa getmirik. Bakıdakı ilk oyunda da bu rəqibə qarşı oynaya biləcəyimizi göstərdik. Həmin qarşılaşmada uduzsaq da, qol imkanlarımız da oldu. Lakin onlardan istifadə edə bilmədik. Meydana çıxıb-çıxmayacağım baş məşqçinin seçimindən asılıdı. Bu görüşdə mənim üçün qol vurmaqdan daha çox nəticə önəmlidi. Əlbəttə, hər futbolçu qol vurmaq istəyir. Lakin komandanın uğuru daha vacibdi”.