2015-ci ildə Topaz Premyer Liqasında 163 qarşılaşma keçirilib. Apasport.az saytının məlumatına görə, 2014/15 mövsümünün ikinci yarısında 73, cari çempionatın ilk 2 dövrəsində 90 görüş baş tutub.

Ötən turnirin ilk yarısının bir oyunu təxirə salınıb, bu il baş tutduğundan ümumi oyun sayında iki komanda digərlərindən fərqlənib. Söhbət hər iki mövsümdə çıxış edən 8 komandadan gedir. Onlardan 6-sı 34, 2-si 35 matça çıxıb.

Ümumiyyətlə isə ilin 12 ayı ərzində 12 komanda Premyer Liqada çıxış edib. Onlardan 4-ü yalnız 1 mövsüm çıxış edib. “Bakı” ötən, “Kəpəz”, “Rəvan” və “Zirə” cari mövsümdə çıxış edib.

Baş tutan 163 qarşılaşmadan 114-də qalib müəyyənləşibsə, 49 dəfə heç-heçə qeydə alınıb. Bu qarşılaşmalarda 344 qol vurulub ki, orta məhsuldarlıq 2,11-ə bərabər olub.

İlin ən yaxşı komandası “Qarabağ”dı. Ağdamlılar il ərzində hamıdan çox qələbə qazanıb, ən az məğlub olub və qol buraxıb. Təbii ki, hər iki mövsümdə çıxış edənlər arasında. Əyalət klubu xal hesabında “İnter”i 8 xal arxada qoyur.

“Bankirlər” ilin ən məhsuldar komandası olan “Qəbələ”ni 1 xal qabaqlayır. Ölkənin ən titullu klubu “Neftçi” 4-cü, AZAL 5-ci sırada yer alıb. Qələbə və məğlubiyyət sayında tarazlıq olan “ağ-qaralar” top fərqində mənfi saldoya malikdi.