“İnter” yarımmüdafiəçi Ruslan Abışovla yollarını ayırıb. Bu barədə məlumatı apasport.az saytına “bankirlər”in prezidenti Azər Əliyev verib.

O bildirib ki, Abışov mövsümün ikinci yarısından etibarən “Neftçi”nin formasını geyinəcək: “Klublar arasında danışıq baş tutub və bu transfer artıq gerçəkləşib. Futbolçu özü də “Neftçi”yə keçməyə razılıq verib”. 

“İnter”in rəhbəri milli komandamızın üzvünün mövsümün sonuna qədər müqavilə müddəti olduğundan, “Neftçi”nin bu keçid müqabilində onlara kompensasiya ödəyəcəyini də əlavə edib.

"İnter"lə ortaq məxrəcə gələn "Neftçi" artıq futbolçunun da razılığını alıb. Paytaxt təmsilçisi onunla uzunmüddətli müqavilə planlaşdırırdı. Lakin Abışov 1,5 illik sözləşmə tələb edib. Nəticədə Ruslanın tələbi ilə razılaşılıb. Yeni komandası ilə artıq rəsmi müqavilə imzalayan oyunçu "ağ-qaralar"ın heyətində 15 nömrəli formanı geyinəcək. 

Qeyd edək ki, Ruslan Abışov 2006-2012-ci illərdə "Neftçi"nin formasını geyinib.