“Birinci hissədə iki qol vurduqdan sonra ikinci yarıda bir az boşalma oldu. Qol buraxsaq da, yekunda lazım olan nəticəni əldə etdik”. Apasport.az saytının məlumatına görə, bu sözləri Azərbaycanın futbol üzrə U-23 millisinin baş məşqçisi Yaşar Vahabzadə deyib.

IV İslam Həmrəyliyi Oyunlarının çempionu olan komandamızın çalışdırıcısı çempionluğu belə şərh edib.

- Hesab arasındakı fərq azalandan sonra matçı əldən verəcəyinizlə bağlı qorxu hissi yaşamadınız?

- Sözün düzü, bir az həyəcan yaşadıq. Oyunçularda da çaşqınlıq yarandı, ancaq çalışdıq ki axıra qədər hesabı qoruyaq, sağ olsunlar uşaqlar əzmkarlıq göstərdilər.

- Əsas millimiz qrup mərhələsində yüksək sıralarda da qərarlaşıb, klublarımız Avroliqanın qrup mərhələsində də çıxış edib, ancaq heç bir komandamız böyük turnirdə medalçı olmayıb. Bu çempionluğu Azərbaycan futbolunun ən böyük uğuru adlandırmaq olar?

- Bu gün üçün bu çempionluq Azərbaycan futbolunun ən böyük uğurudur, ancaq ola bilsin gələcəkdə yığmamız bundan da yaxşı nailiyyətlər əldə eləsinlər.

- Sizin komandanızda nizam-intizamın səviyyəsi nə yerdədi? Sanki ara-sıra oyunçularda narazılıqlar, deyinmələr olurdu...

- Ciddi bir problemimiz yoxdur. Sadəcə meydandakı gərginlik bəzən oyunçuya təsir edir, deyinmələr, aqressivlik bundan yaranır.

- Yığmada istifadə etdiyiniz 3-5-2 sistemi Premyer Liqa klubları tərəfindən çox istifadə olunmur. Maraqlıdı taktikanı sadəcə bu turnir üçün qurmuşdunuz, ya davamlı bu sistemdən yararlanmaq fikriniz var?

- Bu taktikadan keçən tsikldə bu uşaqlarla oynayanda istifadə etmişdim. İndi də U-21-də həmin sistemi tətbiq edirik.

- Bütün turnir boyu sizcə ən yaxşı oyunçu kim oldu?

- Futbol kollektiv oyundu, kimisə fərqləndirmək düzgün olmaz. Hər oyunçu çalışdı ki, əlindən gələni komandaya versin.

- Düzdü, çempionu mühakimə etməzlər, ancaq yəqin ki, sizin də komandadan narazı qaldığınız məqamlar oldu...

- Əsas narazı qaldığım məqam, oyunlar başlamamışdan da qeyd etmişdim, xətlərarası əlaqə bizdə axsayırdı. Bu da bir sıra oyunçuların komandaya gec qoşulması ilə bağlıdır.

- Sizcə ən çətin oyun hansı idi?

- Hər oyununun öz çətinliyi var, ancaq konkret demək lazımdısa, final hamısından çətin oldu.