“Milan”ın və “Yuventus”un sabiq baş məşqçisi, hazırda Çinin “Tszyansu Sunin” klubunu çalışdıran Fabio Kapello maraqlı açıqlama verib. Apasport.az saytı xəbər verir ki, o, İtaliya yığmasının dünya çempionatına vəsiqə qazanmaq şansını dəyərləndirib.
O, pley-off mərhələsinin ilk görüşündə İsveçə uduzan (0:1) “Skuadra Adzurra”nın bu gün baş tutacaq cavab matçında lazımi nəticəni qazanmalı olduğunu bildirib: “İtaliya millisi dünya çempionatına vəsiqə qazana bilməsə, faciə olacaq. Yığmamızın sonuncu dəfə - 1958-ci hansı səbəbdən mundiala yollana bilmədiyi yadımda deyil. Onda 12 yaşım var idi. Hazırda Çində çalışsam da, millinin oyunlarına baxmaq üçün gecə saat 3-də yuxudan oyanıram”.
Kapellonun fikrincə, “Skuadra Adzurra”nı hazırda işsiz olan Karlo Ançelotti çalışdırmalıdı: “İtaliya yığmasında işləmək? Mən artıq milli komandalarda öz borcumu yerinə yetirmişəm. Artıq növbə Ançelottinindi. O, yığmanı çalışdıracaq yaşda və təcrübədədi”.