Bakı. Kənan Həsənov-APA-Sport. Azərbaycanın voleybol üzrə kişilərdən ibarət milli komandası Avropa çempionatının təsnifat mərhələsini uğurla adlayıb. “APA-Sport” agentliyinin məlumatına görə, ilk oyunda Albaniyaya uduzan (1:3) yığmamız Quba Olimpiya Kompleksində keçirilən cavab matçında rəqibini eyni hesabla məğlub edib. Topların fərqində (187:176) Albaniyanı üstələyən komandamız Avropa çempionatının qrup mərhələsində oynamaq hüququ qazanıb. Millimizin də yer aldığı B qrupunda Hollandiya, Latviya və Sloveniya yığmaları mübarizə aparacaq. Qrup oyunlarının birinci mərhələsi mayın 16-dan 18-dək Hollandiyada, ikinci mərhələsi isə mayın 30-dan iyunun 1-dək Sloveniyada təşkil olunacaq.