Azərbaycanın dövlət başçısı İlham Əliyev bu gün növbəti müddətə Milli Olimpiya Komitəsinin (MOK) prezidenti seçilib. Apasport.az saytının məlumatına görə, dövlət başçısı bu gün keçirilən MOK-un V hesabat-seçki Baş Məclisində bütün iştirakçıların səsini qazanıb.

Konfransda çıxış edən İlham Əliyev 2008-ci ilin nəticələrindən razı qaldığını vurğulayıb: “Pekin Yay Olimpiya Oyunlarında idmançılarımız 7 medal qazandılar. Bu yaxşı nəticədir, amma 2012-ci il London Olimpiadasında bundan da yaxşı göstəricilər olmalıdır. Medal qazanılmayan növlərdə problemləri analiz etmək, Londonda kəmiyyət və keyfiyyətdə irəliləyişə nail olmaq lazımdır”.

Tədbirdə 2004-08-ci illər üçün hesabat verilərkən bildirilib ki, 4 il ərzində MOK 5,2 milyon manatlıq büdcənin 4,7 milyon manatını xərcləyib. Həmçinin, yığıncaqda İcraiyyə Komitəsinə 17 və Təftiş komissiyasına 5 üzv seçilib. İcraiyyə Komitəsində yeganə dəyişiklik Vasif Əliyevi “Neftçi” İSM-in rəhbəri Sadıq Sadıqovun əvəzləməsi olub.

Dövlət başçısı Azərbaycanın olimpiya çempionları – Rəfiqə Şabanova, Lyudmila Şubina, Nazim Hüseynov, Namiq Abdullayev, Zemfira Meftahəddinova, Fərid Mansurov və Elnur Məmmədliyə MOK-un xüsusi ordenlərini təqdim edib.

Baş Məclisdən sonra MOK-un İcraiyyə Komitəsinin xüsusi iclasında Azad Rəhimov, Çingiz Hüseynzadə və Xəzər İsayev yenidən qurumun vitse-prezidentləri seçilib. Ağacan Abıyevə isə növbəti dəfə baş katib vəzifəsi tapşırılıb.

Qeyd edək ki, 1997-ci ildən MOK-a rəhbərlik edən İlham Əliyev quruma daha 8 illiyə seçilib.