Türkiyənin “Qalatasaray” klubunun sabiq baş məşqçisi Mixael Skibbeyə məxsus “Mercedes” markalı avtomobili iki il əvvəl qarət edən soyğunçular yaxalanıb. Apasport.az saytının məlumatına görə, 2006-cı ilin dekabrında avtomobilə soxularaq, mobil telefonları, futbol biletləri və şəkilləri aparan 33 yaşlı Cenniferlə 26 yaşlı Bruno yalnız 9 aydan sonra orada nələrin əks olunduğu ilə maraqlanıb. Məşhur almaniyalı mütəxəssisin sevgilisi ilə intim şəkillərini görən cinayətkarlar artıq onların əməlini unudan Skibbeyə zəng vuraraq, onu şantaj ediblər. Mütəxəssisdən 160 min avro tələb edən cütlük bu şəkillərin yerli qəzetlərə satacaqlarını bildiriblər. Həyat yoldaşından gizli sürdüyü həyatın mətbuata sızmasından çəkinən Skibbe polisə müraciət edib. Nömrələnmiş pulların cinayətkarlara verilməsi prosesi isə bu yaxınlaradək uzanıb. Bir neçə dəfə tərəflər arasında görüş yeri müəyyənləşsə də, üzə çıxmaqdan ehtiyatlanan Cenniferlə Bruno pulun dalınca gəlməyi təxirə salıb. Ötən həftə nəhayət ki, onları yaxalayan polis işi məhkəməyə təhvil verib. Skibbe dünənki məhkəmədə şahid qismində çıxış edib.