Azərbaycanın atletika üzrə milli komandasında kütləvi pozuntu qeydə alınıb. Apasport.az-ın Rusiyanın “Ves sport” saytına istinadən məlumata görə, yığmamıza Həbəşistandan 5 idmançı cəlb olunub. Artıq 1990-91-ci il təvəllüdlü atletlərin soyadları da dəyişdirilərək, azərbaycanlılaşdırılıb.

2 oğlan və 3 qız həbəşistanlı legioner indi belə adlanır: Hayle Desta Haqos - Hayle İbrahimov, Senbete Tilahum Vorku - Tilahun Əliyev, Abelav Layes Tiqe - Layes Abdullayeva, Qemaqa Qezasin Hunduma - Qezasin Səfərova, Xurssa Mare Dibaba – Mare İbrahimova.

Adıçəkilən atletlər bu ilin fevralında “milliləşdirilib” və onlar sabah Bosniya və Herseqovinanın paytaxtı Sarayevoda start götürəcək komandalararası Avropa çempionatında Azərbaycanı təmsil edəcəklər. Debüt yarışında afrikalılar orta və uzaq məsafələrə qaçacaqlar.