Məşhur amerikalı boksçu Kris Arreola yarım illiyə bütün yarışlardan kənarlaşdırılıb. Apasport.az saytının məlumatına görə, peşəkar boksçular arasında dünya çempionu titulu uğrunda döyüşdə ukraynalı Vitali Kliçkoya uduzan idmançı 2 ay əvvəlki hərəkətinin cəzasını alıb.

Həmin döyüşdə rəqibi qarşısında ağ bayraq qaldıran boksçu canlı yayımda Kliçkonun ünvanına nalayiq sözlər işlətmişdi. Arreolanın bu söyüşləri isə 6 aylıq cəzaya səbəb olub. Cəza müddəti Kliçko – Arreola görüşünün keçirildiyi tarixdən hesablanır. İndi amerikalı rəsmi oyunlara çıxmaq üçün 2010-cu il martın sonunadək gözləməlidir.