Yanvarın 11-də Almaniyanın Heydelberq klinikasında dünyasını dəyişən Azərbaycan millisinin şahmatçısı Vüqar Həşimovla vida mərasimi keçirilib. Apasport.az saytının məlumatına görə, mərhum Respublika Şahmat Mərkəzindən son mənzilə yola salınıb.

Mərasimdə gənclər və idman naziri Azad Rəhimov, Dövlət Neft Şirkətinin vitse-prezidenti Elşad Nəsirov, bütün idman federasiyalarının rəsmiləri, həmçinin tanınmış idman və ictimai xadimlər iştirak ediblər. Rəhimov mərhumun ailəsinə baş sağlığı verib, fəxri qarovulda dayanıb.

Həşimov III Fəxri xiyabanda torpağa tapşırılıb. Bunun ardından Təzəpir məscidində ehsan veriləcək.

Qeyd edək ki, 1986-cı il iyulun 24-də Bakıda anadan olan Vüqar Həşimov üçqat Azərbaycan çempionu tituluna sahib idi. Qrossmeyster 2009-cu ildə yığmamızın heyətində Avropa çempionu olub. O, 2011-ci ilin yanvarında 1958-ci ildən İtaliyada müntəzəm olaraq keçirilən Recco-Emiliya şahmat turnirinin qalibi olub. Həşimov uzun müddətdir əziyyət çəkdiyi beyin xərçəngindən dünyasını dəyişib.