“Neftçi” klubunun braziliyalı futbolçusu Bruno Bertuççi Azərbaycan kubokunun “Rəvan”la ilk yarımfinal matçından sonra apasport.az saytının əməkdaşının suallarını cavablandırıb
- Komandanız qələbə hesabını niyə qoruya bilmədi?
- Bu cür olacağını gözləmirdik. Düzdü, çətin olacağını bilirdik. Çünki rəqib də kuboku qazanmaq istəyir. Hər şey açıq qalıb. Yekun səfərdə keçiriləcək cavab oyununda bilinəcək.
- Qolu son saniyələrdə buraxdınız. Bu, sona yaxın arxayınlaşmağınızdan qaynaqlanır?
- Açığı, əvəzləndiyim üçün qolu görə bilmədim. Son saniyələrdə top buraxmaq, əlbəttə çox pisdir. Artıq oyun başa çatıb və bu qarşılaşmanı unutmalı, növbəti görüş haqda düşünməliyik.
- Doğma meydanda 1:1 hesabı sizin üçün üstünlük sayıla bilməz. Cavab oyununda nəyə ümid edəcəksiniz?
- İtirəcəyimiz bir şey yoxdur. Rəqib meydanında keçirəcəyimiz oyunda 1 qol vurub, qələbə qazanacağıq. Məncə, narahat olmağa dəyməz, finala çıxacağıq.
- Əvəzlənməyiniz nə ilə bağlı idi?
- Ayağım burxuldu. Buna görə də qaça bilmirdim. Ayağımı yerə basa bilmədiyimə görə, əvəzlənməyimi istədim. Çünki bu halda oyunu davam etdirə bilməyəcəkdim.
- Həftəsonu “Sumqayıt”la qarşılaşacaqsınız. Həmin oyunda iştirak edə biləcəksinizmi?
- Əlbəttə.
- Digər yarımfinal oyununda “Qəbələ” “Xəzər Lənkəran”a böyük hesabla qalib gəldi. Bu barədə nə deyə bilərsiniz?
- Futbolda hər şey ola bilər. Amma 3 top fərqi ilə uduzan komanda üçün dönüş yaratmaq çətin olacaq.