“Qəbələ” klubunun vitse-prezidenti Fariz Nəcəfovun ölkə kubokunun yarımfinal mərhələsində “Xəzər Lənkəran”la oyundan sonra apasport.az saytının əməkdaşının suallarını cavablandırıb.
- 3:0 hesablı qələbə qazandınız. Komandanızın oyunu sizi qane etdi?
- Əlbəttə, hesab hər şeyi göstərir. Bu nəticədən narazı qalmaq olar?
- “Qəbələ”nin artıq finalda oynayacağını demək olar?
- Yox. Çünki futbolda hər zaman sürprizlər olur. Amma 3:0 böyük üstünlükdür. Səfərdə daha rahat oynaya biləcəyik. “Xəzər Lənkəran” zəif komanda deyil. Ona görə də finalda olduğumuzu demək olmaz.
- Bundan sonra əsas diqqəti kuboka yönəldəcəksiniz, yoxsa çempionatda iddialı yerlər uğrunda mübarizəniz davam edəcək?
- Harada şansımız varsa, orda da davam edəcəyik. Premyer Liqada 3-cü yer üçün iddiamız qalır. Finala çıxsaq belə, orda bizi daha bir komanda gözləyəcək. Ona görə də çempionatda da davam etmək lazımdır.
- Çempionatda belə istəklə oynamayan komandanız bu gün tam fərqli çıxış etdi...
- Yox, deməzdim ki, biz çempionatda istəkli oynamırıq. Orda da qələbə üçün “döyüşürük”. Amma futbolda uğursuzluqlar olur. Kubokda “Qarabağ” kimi komandanı mübarizədən kənarlaşdırdıq, “Xəzər Lənkəran” üzərində 3:0 hesablı qələbə qazandıq. Bunlar “Qəbələ”nin gücündən xəbər verir. “Uğursuzluq zolağı”ndan çıxmaq lazım idi. Bundan sonra çempionatda da qələbələr lazımdır.
- Bu qələbə komandanı arxayınlaşdıra bilər?
- Arxayınlaşmaq olmaz. Əslində, qarşıdakı oyunlara daha yaxşı motivasiya ilə çıxmaq lazımdır. Yəni, komanda özünəinamı geri qaytarmalıdır. Belə potensialı olan komanda hər oyunda qalib gəlməlidir. İnanırıq ki, hələ çox sevinəcəyik.
ELSEVƏR