“Qarşılaşmadan sonrakı təəssüratlarımızı izah etmək çox çətindir”. Apasport.az saytının məlumatına görə, bunu Hollandiyanın “Tvente” klubunun futbolçusu Luk Kastaynos deyib.
Təcrübəli hücumçu Avropa Liqasının pley-off mərhələsinin “Qarabağ”la cavab matçını şərh edib. Kastaynos 1:1 hesabı ilə bitən görüşdə bərbad oynadıqlarını etiraf edib: “Üstünlüyümüzü qoruya bilmədik. Bu da çox üzücüdür. Hesab 1:0 olarkən ikinci qolu vurmaq istəyirdik. Amma nəinki bunu bacardıq, heç hesabı da qoruya bilmədik. Hesab 1:1 olduqdan sonra çox bərbad oynadıq. Artıq topla da yaxşı rəftar edə bilmədik”.
Komandasının yeganə qolunun müəllifi bəxtdən də şikayətlənib: “Bəxt də sanki bizdən üz döndərmişdi. Bir dəfə mən, bir dəfə də Hakim Ziyeh dirəyə “düşdü””.
Qeyd edək ki, Bakıda “Tvente” ilə 0:0 hesablı heç-heçə edən “Qarabağ” Hollandiyadakı bərabərlikdən (1:1) sonra səfər qolu sayəsində qrup mərhələsinə yüksəlib.