Azərbaycan millisinin voleybolçusu Polina Rəhimova Cənubi Koreya çempionatında növbəti oyununa çıxıb. Apasport.az saytının məlumatına görə, 24 yaşlı hücumçumuzun şərəfini qoruduğu “Hyundai” IX tur çərçivəsində “Huenqkuk”un qonağı olub.
Evdə rəqibini 3:1 hesabı ilə məğlub edən Rəhimovanın komandası səfərdə çətinliklə üzləşib. Lakin onlar buna baxmayaraq, gərgin matçdan qələbə ilə ayrılmağı bacarıblar – 3:2 (25:23; 25:13; 22:25; 29:31; 15:12).
Polina qarşılaşmada 43 xal toplayıb. O, bunlardan 38-ini hücumda, 3-ünü servisdə və 2-sini blokda qazanıb.
Qeyd edək ki, bu qələbə ilə xallarının sayını 17-yə çatdıran “Hyundai” liderliyini qoruyub. Onlar növbəti görüşdə EX klubu ilə üz-üzə gələcəklər. Qarşılaşma dekabrın 3-nə təsadüf edəcək.