Rio de Janeyro. Vüqar Xeyrullayev - APA-Sport. Braziliyanın Rio de Janeyro şəhərində keçirilən güllə atıcılığı üzrə dünya kubokunun növbəti mərhələsində azərbaycanlı idmançı Nigar Bağırova 16-ci yerlə kifayətlənib. «APA-Sport» agentliyinin məlumatına görə, tapança ilə 10 metr məsafədən atəş açmaqda Azərbaycan təmsilçisi 378 xal toplayıb. Dörd seriyadan ibarət seçmə mərhələdə 16-cı olan N.Bağırova final mərhələsinə vəsiqə verən 8-ci yerdən cəmi 4 xal geri qalıb.
Qeyd edək ki, seçmə mərhələdə 387, finalda isə 97,8 xal yığan isveçrəli Sandra Kolli yarışın qalibi olub.