Bakı. Kənan Həsənov-APA-Sport. Avropa Həvəskar Boks Assosiasiyası yeni reytinq cədvəlini dərc edib. “APA-Sport” agentliyinin məlumatına görə, 11 çəki dərəcəsi üzrə açıqlanan siyahıda 20 ən güclü boksçu yer alıb. Azərbaycan milli komandasının üzvləri cəmi üç çəkidə təmsil olunmayıblar. Ən aşağı çəkidə (48 kq) bir pillə geriləyən Ceyhun Abıyev 20-ci yeri tutub. 51 kq çəki dərəcəsində Afina Olimpiadasının bürünc mükafatçısı, karyerasını başa vuran Fuad Aslanov 5-ci sıradakı mövqeyini qoruyub. 54 kq çəki dərəcəsində, Pekin olimpiadasına lisenziya qazanan Samir Məmmədov ötən ay olduğu kimi yenə ikinci olub ki, bu da təmsilçilərimiz arasında ən yüksək göstəricidir. Bu çəkidə yeganə dünya çempionumuz Ağası Məmmədov bir pillə geriləyib və hazırda 9-cu sıradadır. Pekin Olimpiadasına vəsiqə qazanan sonuncu boksçumuz Şahin İmranovun da mövqeyində dəyişiklik olub. Bir pillə geriləyən yığmanın kapitanı 57 kq çəki dərəcəsində 6-cı yerdədir. Hərəyə bir pillə geriləyən Romal Amanov (60 kq) 15-ci, Fərhad Acalov (64 kq) 17-ci yeri tutub. Lisenziya xarakterli beynəlxalq turnirlərdə uğursuz çıxış edən Emil Məhərrəmovun (64 kq) adı isə siyahıdan çıxarılıb. Milli komandamızın digər üzvlərindən Rahib Bəylərov (75 kq) 6-cı, Elçin Əlizadə (91 kq) 5-ci pilədəki yerlərini qoruyublar. Boksçularımız 69, 81 və +91 kq çəki dərəcələri üzrə açıqlanan siyahıda yer almayıblar.

• Anar Ələkbərov Beynəlxalq Avtomobil Federasiyasının Senatına üzv seçilib
• Azərbaycan Üzgüçülük Federasiyasında yeniliklər olub
• “Pool Nine Ball” üzrə Bakı şəhər çempionatı keçiriləcək
• Yevlax Olimpiya İdman Kompleksinə media-tur təşkil olunub
• İlham Əliyev Yevlax Olimpiya İdman Kompleksində görülmüş işlərlə tanış olub - YENİLƏNİB