Yoahim Löv: “İspaniyalılar qızıl medallara layiq idilər”

30.06.2008 - 11:36

Bakı. Mehman Süleymanov - APA-Sport. “İlk öncə İspaniya yığmasını və rəqib komandanın baş məşqçisini təbrik edirəm. Bütün turnir boyu əla oyun göstərən ispaniyalılar qızıl medallara layiq idilər”. “APA-Sport” agentliyinin məlumatına görə, bu sözləri Avropa çempionatının gümüş mükafatçısı Almaniya yığmasının baş məşqçisi Yoahim Löv deyib. 48 yaşlı çalışdırıcı finalda İspaniya milli komandasına məğlubiyyətin (0:1) səbəbini belə izah edib: “Matçın ilk 15 dəqiqəsinə nəzarət etməyimizə baxmayaraq, sonradan rəqib tempi artırdı. Biz ispaniyalılarla eyni səviyyədə mübarizə apara bilmirdik. İspaniyalı futbolçuların yüksək səviyyədə olduğunu etiraf etməliyik. Bu gün əla texnika nümayiş etdirən rəqib bizdən çox qol vəziyyəti yaratdı. Onlar topla yaxşı davranır, sürətli ötürmələr verir, təkbətək mübarizələrdə qalib gəlirdilər. Yaxın günlərdə səhvlərimizi təhlil edərək, gələcəkdə bunları təkrarlamamağa çalışacağıq”. Avropa çempionu titulunu qazana bilmədiklərindən məyusluğunu gizlətməyən Y.Löv ümumilikdə nəticədən razı qalıb: “Turnirin digər favoritləri İtaliya, Fransa və Hollandiyanın necə çıxış etdiyini nəzərə alsaq, komandamız əla nəticə göstərdi. Birlikdə keçirdiyimiz 45 gün ərzində komanda çox yaxşı təsir bağışladı. Biz hazırlıq prosesindən xeyli zövq aldıq. Bununla belə, iddiamız da var idi. İspaniya ilə oyundakı məğlubiyyət bizi qarşıdakı bir neçə ildə daha çox işləməyə məcbur edəcək”. 2010-cu ildə dünya çempionatının seçmə mərhələsində milli komandamızla eyni qrupda mübarizə aparacaq Almaniya yığmasının çalışdırıcı qarşıda duran vəzifələrdən danışıb: “Öz məqsədimizə çatmaq, dünya çempionatının final mərhələsinə yüksəlmək üçün seçmə mərhələdə oyunumuzu artırmalıyıq. Son iki ildə sürətli və kombinasiyalı futbol oynamağı bacardığımızı göstərə bildik. Biz inkişaf etsək də, enerji və gücümüzü itirməməliyik”.
Qeyd edək ki, 2009-cu ildə yığmamız Almaniyanı dünya çempionatının seçmə qrup mərhələsi çərçivəsində iki dəfə sınağa çəkəcək.