Bakı. Aqşin Əliyev - APA-Sport. Azərbaycan şahmatçısı Vüqar Həşimov Rusiyanın Poykovski şəhərində XII dünya çempionu Anatoli Karpovun şərəfinə həsr olunan beynəlxalq turnirdə ikinci qələbəsini qazanıb. “APA-Sport” agentliyinin məlumatına görə, 22 yaşlı idmançı 6-cı turda ukraynalı Andrey Volokitinlə görüşüb. Ağ fiqurlarla oynayan V.Həşimov rəqibini 25-ci gedişdə mat edib. Bununla da, həmvətənimiz məğlubiyyətsiz oyunlar seriyasını 5-ə çatdırıb. Hesabat turunda Dmitri Yakovenko (Rusiya) Viorel Baloqana (Moldova), Aleksey Şirov (İspaniya) Aleksandr Onişuka (ABŞ), Van Xao (Çin) isə Emil Sutovskiyə (İsrail) qalib gəlib. Yeganə heç-heçə yerli şahmatçılar Sergey Rublyovski ilə Ernesto İnarkiyev arasındakı görüşdə qeydə alınıb. Beləliklə, V.Həşimov növbəti qələbə sayəsində yarış cədvəlində mövqeyini yaxşılaşdırıb. Aktivində 3,5 xal olan beynəlxalq qrossmeysterimiz V.Xao ilə birgə 4-5-ci yerləri bölüşdürür. O, liderlər qrupundan yarım xal geri qalır. Bu gün V.Həşimov qara fiqurlarla V.Baloqana qarşı mübarizə aparacaq. Növbəti iki gündə A.Şirov və V.Xaonu da sınağa çəkəcək şahmatçımız bununla da beynəlxalq turnirdə çıxışını başa vuracaq.

• Prezident İlham Əliyev yubiley münasibətilə paralimpiya hərəkatının iştirakçılarını təbrik edib
• AMADA rəhbəri Təhminə Tağı-zadə Yunanıstanda süni intellektin antidopinqdə tətbiqindən danışıb
• Prezident paralimpiya hərəkatının inkişafında xidməti olan bir qrup şəxsi təltif edib
• ATPF Beynəlxalq Padel Federasiyasının 36-cı Baş Assambleyasında təmsil olunub
• Azərbaycanlı Formula 4 pilotu Davin Cəfərov Slovakiya Ring trasında növbəti testlərini uğurla başa vurub!