Mayın 22-də Polşanın Poznan şəhərində kayak və kanoe qayıqlarında avarçəkmə üzrə Dünya Kubokunun II mərhələ yarışına start veriləcək. Apasport.az saytının məlumatına görə, 3 gün davam edəcək turnirdə kanoeçilərin mübarizəsində Azərbaycan da təmsil olunacaq.

1 nəfərlik qayıqda Valentin Demyanenko 500 metr və 1000 metrlik məsafələrə yürüşdə qüvvəsini sınayacaq. 2 nəfərlik qayıqda isə hər iki məsafəni Maksim Prokopenko – Sergey Bezuqlıy dueti qət edəcək.

Demyanenko ötən il məhz Poznanda keçirilmiş Dünya Kubokunun III mərhələsində 200 metr və 500 metr məsafələrə yürüşdə hamını qabaqlayaraq, 2 qızıl medal qazanmışdı. O, daha bir qızıl medala Macarıstanın Seqed şəhərində təşkil olunmuş Dünya Kubokunun I mərhələsində layiq görülmüşdü.

Prokopenko – Bezuqlıy dueti isə Azərbaycan yığmasının heyətində ilk dəfə beynəlxalq yarışa qatılacaq. Əvvəllər Ukrayna millisinin tərkibində dünya çempionatının bürünc, Avropa çempionatının gümüş medalını qazanan cütlük 2008-ci il Pekin Yay Olimpiya Oyunlarında da mübarizə aparıb. Onlar 500 metrlik məsafəyə yürüşdə 9 idmançının yer aldığı finala çıxsalar da, yekunda 8-ci yerlə kifayətləniblər.

amaf.az