Ermənistan Boks Federasiyası (EBF) Beynəlxalq Həvəskar Boks Assosiasiyasının (AİBA) prezidenti Çinq-Kuo Vuya rəsmi məktub ünvanlayıb.

Lent.az-ın “Novosti Armeniya”ya istinadən verdiyi məlumata görə, bu haqda jurnalistlərə EBF-nin I vitse-prezidenti Derenik Qabrielyan məlumat verib.

Qabrielyan bildirib ki, Çinq-Kuo Vudan 2010-cu ildə Bakıda keçiriləcək gənclər arasında dünya çempionatında erməni nümayəndə heyətinin təhlükəsizliyini təmin etməyi xahiş ediblər. EBF rəsmisi bu il yeniyetmələr arasında dünya çempionatının İrəvanda keçirildiyini və AİBA prezidenti tərəfindən yüksək qiymət aldığını vurğulayıb.

Azərbaycan Boks Federasiyasının I vitse-prezidenti Ağacan Abiyev isə Lent.az-a açıqlamasında Ermənistan tərəfinə təhlükəsizlik təminatının veriləcəyini bildirib: “Başa düşə bilmirəm, EBF niyə bizə yox, AİBA-ya müraciət edib. Hər halda, ermənilər dünya çempionatında iştirak etmək istəyirlərsə, yəqin ki, onlara təhlükəsizlik təminatı veriləcək. Çünki bu, 2010-cu il Yeniyetmələrin Sinqapur Yay Olimpiya Oyunlarına lisenziya xarakterli yarışdır. Onlar Bakıdakı dünya birinciliyində çıxış etməsələr, olimpiadaya yollana bilməzlər”.

23 – 30 mayda İrəvanda keçirilmiş yeniyetmələrin dünya birinciliyində Azərbaycan yığması iştirak etməyib. Abiyev bunu komandamızı yarışa göndərmək istəməmələri ilə izah edib.

Bakıda keçiriləcək gənclər arasında dünya çempionatı 2010-cu il 20 – 30 apreldə baş tutacaq.

Qeyd edək ki, 2007-ci ildə Bakıda keçirilmiş güləş üzrə dünya çempionatında da Ermənistan yığması mübarizə aparıb.

• Formula-1: Azərbaycan Qran-prisinin vaxtı dəyişdirilib
• Bakıda Padel tennis üzrə beynəlxalq yarışın qalibləri mükafatlandırılıb
• ABŞ-də yaşayan azərbaycanlı peşəkar hokkeyçidən Bakıda ustad dərsi
• Anar Ələkbərov Beynəlxalq Avtomobil Federasiyasının Senatına üzv seçilib
• Azərbaycan Üzgüçülük Federasiyasında yeniliklər olub