Güləşimizə iki “beş”: 55 çempionluq

05.04.2022 - 12:39

Azərbaycan güləşçiləri Avropa çempionatlarında qazanılan qızıl medalların sayını 55-ə çatdırıb.

Apasport.az saytının məlumatına görə, Macarıstanın paytaxtı Budapeştdə təşkil olunan yarışda qazanılan üç qızılla yığmamız çempionluq sayında iki “5”ə çatıb.

Ümumiyyətlə isə müstəqillik əldə olunandan sonra güləşçilərimiz Avropa çempionatlarında 189 mükafat əldə edib. Pəhləvanlarımızın hesabında 55 qızıldan başqa 47 gümüş və 87 bürünc də var.

1911-ci ildən təşkil olunan və 73 dəfə baş tutan çempionatların tarixində Azərbaycan medal sayında 8-ci yerdə qərarlaşıb. 111 il ərzində 4609 medal – 1393 qızıl, 1399 gümüş və 1817 bürünc sahibini tapıb.

Ümumi medal sıralamasına Rusiya başçılıq edir. Cədvəldə SSRİ-nin varisi sayılan şimal qonşularımız böyük üstünlüklə zirvədədir. Bolqarıstan ikinci, Türkiyə üçüncüdür.

8-ci olan Azərbaycan Ukraynadan 6, Macarıstandan 11 qızıl az qazanıb. Düzdür, ümumi medal sayında bu ölkələrin üstünlüyü daha böyükdür və hətta Polşa bizdən öndədir. Lakin mükafatların əyarında səkkizinci olan Azərbaycan yaxın illərdə iki addım irəliləmək imkanına malikdir.

yer	ölkə	qızıl	gümüş	bürünc	cəmi
1	Rusiya	474	201	207	882
2	Bolqarıstan	144	150	148	442
3	Türkiyə	111	91	143	345
4	Almaniya	90	138	157	385
5	İsveç	83	74	67	224
6	Macarıstan	66	94	120	280
7	Ukrayna	61	83	121	265
8	Azərbaycan	55	47	87	189
9	Polşa	38	67	110	215
10	Finlandiya	36	36	47	119