Bakı “İnter”inin sabiq futbolçusu, hazırda “Santa-Klara”nın məşqçisi olan Daildo Assiolinin apasport.az saytına müsahibəsi

- “Santa-Klara”dakı işinizi davam etdirirsiz?
- Bəli, komandada köməkçi məşqçi kimi işləməyə davam edirəm. Hazırda çox rəqabətli çempionat olan Portuqaliya Sequndasına liderlik edirik. Ötən mövsüm, təəssüf ki, aşağı liqaya düşdük, amma bu il qarşıda çox işimizin olduğunu bilsək də, hər şey yaxşı gedir.

- Maraqlıdır, son vaxtlar Azərbaycan klublarından sizə təkliflər olubmu? Azərbaycanda işləmək fikriniz varmı?
- Azərbaycan klublarından hələ ki, mənimlə əlaqə saxlanılmayıb. Azərbaycan futbolu ilə əlaqəm çox güclüdür. Uzaqdan da olsa, oyunları izləyirəm, hazırda oynayan dostlarla danışıram. Şübhəsiz ki, mənim arzum var ki, bir gün Azərbaycan futbolunda futbolçu olduğum dövrə bənzər möhkəm bir layihəni öhdəmə götürə bilim. Mən özümü elə hazırlayıram ki, bu fürsət yarananda ən yaxşı şəkildə cavab verim.

- Ümumiyyətlə, Azərbaycan futbolunu, Premyer Liqasını izləyirsiniz?
- Oyunların çoxunu izləyirəm. Heyf ki, köhnə komandam aşağı liqaya düşdü. “Qarabağ” bu illər ərzində komandasını yaxşı tanıyan məşqçisinin əməyi və eyni zamanda klubun skaut fəaliyyəti nəticəsində hegemonluğunu qoruyub. Azərbaycan Premyer Liqası hazırda çox cəlbedici çempionatdır.

- “Qarabağ”ın yarımmüdafiəçisi Julio Romao ilə münasibətiniz qalıb? Onunla danışırsız?
- Julio əla dostdur! Onun “Qarabağ”a keçmək ehtimalı yaranan kimi dərhal mənimlə danışmaq istədi. Onun şəhər, futbol, mədəniyyətlə bağlı çox şübhələri var idi. İllər əvvəl onun kimi şübhələrim olduğu kimi mən də ona kömək etməyə hazır idim. Onunla sonuncu dəfə Azərbaycan - İsveç oyununda 3:0 hesabı ilə qalib gəldiyiniz gün danışmışdım. Mən evdə oyuna baxırdım və ona matçın şəkli ilə mesaj göndərdim. Bu gözəl qələbə idi! Julio hazırkı durumundan çox razıdır. O, çox perspektivli, istedadlı və qalib gəlmək arzusunda olan gəncdir! Romao dünyanın bütün uğurlarına layiqdir.

- Romao "Qarabağ"a gələndə əsas komandanın üzvü deyildi. Amma siz həmişə deyirsiniz ki, zaman keçdikcə yaxşılaşacaq. Həqiqətən də elə oldu. Onun əsas heyət üzvü olacağına niyə inanırdız?
- Mən Julionu “Santa Klara”da keçirdiyi vaxtdan yaxşı tanıyıram və Azərbaycan çempionatındakı futbol üslubunu da bilirəm. Mən bilirdim ki, onun xüsusiyyətləri Qurban Qurbanovun oyun modelinə çox uyğun gələcək. Üstəlik, adaptasiya faktoru vacibdir, xüsusən onun kimi gənc oyunçularda.

- Romao hazırda "Qarabağ" üçün çox vacib fiqurdur. Hətta onu transfer etmək istəyən klublar var. Bəlkə “Qarabağ”a Romaonu saxlamaq çətin olacaq? Xarici klublar onu transfer etmək istəyir...
- Julionun inkişaf etdirdiyi performansı nəzərə alsaq, onun çıxışının digər klublarda da maraq doğurması təbiidir. Məsələ burasındadır ki, qeyd etdiyim kimi, Qurban Qurbanovun çox yaxşı rəhbərlik etdiyi komanda kollektiv çıxışı ilə seçilir. Bu, təkcə Julionun deyil, digər futbolçuların da yaxşı çıxışına üstünlük verir. "Qarabağ" heyətində olan yaxşı oyunçular üçün cəlbedici klubdur və Julio üçün mümkün gediş klub üçün böyük itki olardı. Görək qış pəncərəsində nələr baş verəcək...

- "Qarabağ"a Portuqaliyadan gələn digər oyunçu Juninyodur. O, “Çaveş”də oynayıb. Onun haqqında nə düşünürsünüz? O, artıq “Qarabağ”ın əsas qol “silah”ıdır...
- Juninyo həm “Çaveş”, həm də “Eştoril”də Portuqaliya futbolunda fərqlənirdi. Hücumda hərəkətliliyi və birdən çox mövqedə oynamaq bacarığı ona yaxşı çıxış imkanı verdi. Bu il çox qol vurmaqla daha təsirli rola yiyələnib və biz hələ çempionatın ilk dövrəsini başa vurmamışıq. O, şübhəsiz ki, “Qarabağ”a qolları və yaxşı performansı ilə töhfə verməyə davam edəcək.

- Sizcə, Portuqaliyadan transfer olunan futbolçular niyə "Qarabağ"da yaxşı oynayır? Bunun sirri nədir?
- Portuqaliya futbolu metodoloji baxımdan kifayət qədər inkişaf etmişdir. Federasiya tərəfindən məşqçilərin hazırlanmasına xeyli sərmayə qoyulur və bu, idman təcrübəsinin təkmilləşdirilməsinə öz töhfəsini verib. İdmançıların seçimi də çoxlu təhlillərin nəticəsindədir. Ona görə də mən Portuqaliya futbolunu yaxşı istedad mənbəyi hesab edirəm. Şübhəsiz ki, Portuqaliya kəşf edilməli bir çempionatdır.