"Neçə medal qazanacağımızı deyə bilmərəm. Cüdoda hər saniyənin öz hökmü var".
Apasport.az xəbər verir ki, bunu jurnalistlərə müsahibəsində kişi cüdoçulardan ibarət Azərbaycan millisinin baş məşqçisi Riçard Trautman deyib.
Almaniyalı mütəxəssis Monteneqronun paytaxtı Podqoritsada keçiriləcək Avropa çempionatı ilə bağlı fikirlərini bölüşüb:
"Olimpiya çempionu 10 saniyəyə uduza bilər. Ən azı iki qızıl medal hədəfləyirik. Bu, üç və ya dörd də ola bilər. Digər növlərdən fərqli olaraq cüdoda proqnoz vermək çətindir. İdmançıların bəziləri olimpiadadan sonra istirahət etdilər. Zədələrini sağaldanlar var. Ümid edirəm ki, Avropa çempionatından yaxşı nəticə ilə qayıdacağıq".
O, yığmamızın üzvlərinin rəqiblərini təhlil etdiklərini bildirib:
"Avropa çempionatına qitənin ən yaxşıları gələcəklər. Rusiyanın, Gürcüstanın və Fransanın belə idmançıları var. Hər bir idmançını fərdi olaraq hazırlayırıq".
O, 90 kq-da çıxış edəcək cüdoçunun daha sonra bəlli olacağını xatırladıb:
"Elcan Hacıyev gənc idmançıdır. Zədəsini yeni sağaldıb. O vaxt Avropa çempionu olması sürpriz deyildi. Bu dəfə Turan Bayramovdan və Ruslandan da qızıl medal gözləyirəm. Sürpriz edə bilərlər. Amma çətin olacağını bilirəm".
Baş məşqçi həmçinin Hidayət Heydərov və Zelim Kotsoyevin yaxşı formada olduğunu dilə gətirib:
"Yaponiyada çox yaxşı təlim-məşq toplanışı keçmişik. Son hazırlıqları Bakıda görürük. Olimpiya çempionlarımız da bu turnirə qatılacaqlar. Hidayət Heydərov və Zelim Kotsoyev yaxşı formadadır. Onların uzun müddətdən sonra ilk sınaqları olacaq. Yarışa bir neçə həftə var. Öncədən nəsə demək mümkün deyil. Ciddi zədəsi olan idmançı yoxdur. Avropa və dünya çempionatında ən yaxşı nəticəni qazanmağı planlaşdırırıq".
Qeyd edək ki, Avropa çempionatı aprelin 23-dən 27-dək təşkil olunacaq.
Oxşar xəbərlər
Ana səhifə
Bütün xəbərlər