“Araz-Naxçıvan”ın müdafiəçisi Slavik Alxasov apasport.az saytına müsahibə verib.
- "Araz-Naxçıvan" mövsümü 3-cü pillədə başa vurdu və Konfrans Liqasında oynamaq haqqı qazandı. Demək olar ki, hədəfə çatdınız?
- Sevindirici hal oldu ki, həm mövsümü 3-cü pillədə başa vurduq, həm də komanda Konfrans Liqasına vəsiqə qazandı. Demək olar ki, komanda olaraq, rəhbərliyin istədiyi hədəfə çatdıq.
- Maraqlı məqamlardan biri odur ki, "Araz-Naxçıvan" uzun müddət qələbə qazana bilmədi. Amma ən yaxın izləyiciləriniz də sizə çata bilmirdi. Qələbəsizlik olan ərəfədə təhlükə hiss edirdiz ki, rəqiblər sizi gəlib keçər?
- Biz mövsümün ikinci hissəsində, qələbə az olan halda da, çalışırdıq ki, uduzmayaq. Ən azından aktivimizə bir xal yazdırmağa çalışırdıq. Bizə maraqlı olan öz oyunumuz, öz nəticələrimiz idi.
- Ümumiyyətlə, mövsümü özün üçün necə dəyərləndirirsən? Səncə, daha yaxşı ola bilərdi, yoxsa bu mövsümkü performansından razı qaldın?
-nMövsümü normal dəyərləndirərdim. Hər halda, 30 matçda forma geyindim. Buna görə də çox şadam. Bu da yaxşı nəticədir. Təbii ki, daha yaxşı da ola bilərdi.
- Yeni mövsüm də səni "Araz-Naxçıvan"da görəcəyik. Başqa təkliflər var idi?
- Elə mən burada qalmağı düşünürdüm. Çünki komandanı dəyişmək fikrim yox idi. "Araz-Naxçıvan"dakı həm rəhbərlik, həm məşqçi, həm ümumilikdə kollektiv mənə doğmalaşmışdı. Belə olan halda, təklif olsa da, komandanı dəyişmək istəməzdim. Sağ olsunlar, yeni müqavilə təklif etdilər. Mən də düşünmədən bunu dəyərləndirdim.
- Yeni mövsüm Premyer Liqada legioner limiti tətbiq edilməyəcək. Səncə, bu, yerli futbolçuların maaş və özünə klub tapmaq məsələsinə necə təsir edəcək?
- Əlbəttə ki, təsiri olacaq. Bu, 100 faizdir. Amma bunu fikirləşərək, həvəsdən düşsək, lap eniş yaranar. Ona görə ki, qərar artıq çoxdan verilib. Bununla barışıb, güclü qalmalı və formada olmalısan.
Oxşar xəbərlər
Ana səhifə
Bütün xəbərlər