Bakıda atletika üzrə yeniyetmələrin II Olimpiya Oyunlarına lisenziya xarakteri daşıyan Avropa Təsnifat Turnirinin ikinci günü Azərbaycan idmançıları üçün uğurla başlayıb. Apasport.az saytının məlumatına görə, üç təkanla tullanmada ölkəmizi təmsil edən Nazim Babayev iki cəhdin yekununda 15.81 metr göstərməklə A qrupunu 1-ci yerdə başa vurub.

Bu nəticə ilə Nazim Babayev həm turnirin rekordunu təzələyib, həm də yarışın final mərhələsinə vəsiqə qazanıb (rekord 15.55 metr olmaqla Bolqarıstan təmsilçisi Georgi Tsonova məxsus idi). 17 yaşı tamam olmayan Nazim Babayev ilk mərhələdə Rusiya idmançısı Vitaliy Pavlov, İspaniya atleti Alejandro Kedar, Ukrayna təmsilçisi Pavlo Beznitsi qabaqlayıb.

Üç təkanla tullanmada final mərhələsi sabah keçiriləcək. 12 idmançı Avropa Təsnifat Turnirinin medalları ilə yanaşı, həm də avqustda Çində keçiriləcək Yeniyetmələrin Olimpiya Oyunlarına lisenziya qazanmağa çalışacaq. İlk 7 yerin sahibi lisenziya əldə edəcək.

• Azərbaycan üzgüçüləri "İpək Yolu" Dünya Kubokunda ölkə rekordlarını yeniləyiblər
• Rüfət Efendiyev Avropa Şurasının antidopinq iclasında iştirak edib
• Azərbaycan üzgüçüləri Bakıdakı Dünya Kubokunun təsnifat mərhələsində çıxış ediblər
• Şose velosipedi üzrə Avropa çempionatında iştirak edəcək Azərbaycan təmsilçiləri bəlli olub
• AMADA Londonda keçirilən beynəlxalq konfransda təmsil olunub