Pekin. Elşən Məmmədov – APA-Sport. Çinin paytaxtı Pekində keçirilən XXIX Yay Olimpiya Oyunlarında bu gün Azərbaycanın daha iki ağırlıqqaldıranı körpücük üzərinə çıxıb. «APA-Sport» agentliyinin məlumatına görə, 69 kq çəkidə yarışan Turan Mirzəyev və Əfqan Bayramov ən güclü idmançıların yer aldığı A qrupunda mübarizə aparıblar. Birdən qaldırmada T. Mirzəyev 146 kq, Ə. Bayramov isə 145 kq ağırlığın öhdəsindən gəliblər. Təkanla qaldırmada isə hər iki idmançımız 187 kq sifariş versə də, bu ağırlığın öhdəsindən gələ bilməyib. Əvəzində onlar ilk cəhddə müvafiq olaraq qaldırdıqları 181 kq və 175 kq ağırlıqla kifayətlənməli olublar. Nəticədə iki hərəkətin cəmində T. Mirzəyev 327 kq nəticə ilə 5-ci, Ə. Bayramov isə 320 kq göstərici ilə 7-ci yeri tutub. Qızıl medala isə çinli Huy Liao layiq görülüb. O, iki hərəkətin cəmində 348 kq (158 kq + 190 kq) nəticə göstərib. 338 kq ağırlıq qaldıran fransalı Vensela Tebaya Tientşeu ikinci, eyni nəticəyə malik ermənistanlı Tiqran Martirosyan isə bürünc medal qazanıb.
Qeyd edək ki, ağır atletlərimizdən ilk olaraq, qüvvəsini sınayan Sərdar Həsənov (62 kq) da medal qazana bilməyib. Qalan iki ağırlıqqaldıranımıza gəldikdə, İntiqam Zairov (85 kq) avqustun 15-də, ikiqat dünya çempionu Nizami Paşayev (94 kq) isə avqustun 16-da sonra mübarizəyə qoşulacaqlar.

• Azərbaycan Üzgüçülük Federasiyasının İcraiyyə Komitəsinin tərkibi təsdiq edilib
• “Neftçi” İdman Klubu ötən ili 1001 medalla başa vurub
• Bakı sakinləri övladlarını niyə idmana yazdırır? - SORĞU
• Nazir keçmiş müavini ilə selfisini paylaşdı-MÜZAKİRƏLƏRƏ SƏBƏB OLDU - FOTO
• Mariana Vasileva Gənclər və idman nazirinin müavini vəzifəsindən azad edilib