Qış çempionu I dövrəyə yekun vuracaq

23.12.2011 - 18:41

Sabah kişi basketbolçular arasında Azərbaycan çempionatının I dövrəsinə yekun vurulacaq. Apasport.az saytının məlumatına görə, qış çempionu müəyyənləşdiyindən ikinci pillədə dəyişiklik ola bilər.

Belə ki, artıq ötən turdan I dövrədə birinci yeri təmin edən “Araz” özündən 1 xal az toplayan “Çağ öyrətim”lə üz-üzə gələcək. Naxçıvan təmsilçisi oyunun aşkar favoritidir. Çünki son 2 ildə rəqib tanımayan Tahir Baxşıyevin yetirmələrinin “şagirdlər”lə dueldə xal itirəcəkləri inandırıcı deyil.

Təbii ki, “Çağ öyrətim”in xal itirməsi “Qala” üçün də “göydəndüşmə” olacaq. Onlar autsayder BDU-ya böyük hesabla qalib gələcəkləri halda, top fərqinə görə ikinci pilləyə yüksələ bilərlər. Lakin debütant sensasiyaya imza atarsa, “Qala” yerində sayacaq.

NTL-Tudor – AZTOP görüşündə isə birincilərin qələbəsi gözlənilir. Bu qələbə həm də onlara çempionatın sonunda yarımfinala yüksəlməsi üçün vacibdir.

24 dekabr
I dövrə
V tur
12:00. “Qala” – BDU
13:30. NTL-Tudor – AZTOP
15:00. “Çağ öyrətim” - “Araz”